قونايەۆ قالاسىندا مەكتەپ وقۋشىلارى اراسىندا العاش رەت «بولاشاق چەمپيوندار ليگاسى» اتتى سپورت دوداسى باستاۋ الدى. جاس سپورتشىلاردى بىرىكتىرگەن بۇل جارىس فۋتبول، ۆولەيبول جانە باسكەتبول سپورت تۇرلەرىن قامتىپ، الداعى ەكى اي بويى جالعاسادى.
جارىستىڭ سالتاناتتى اشىلۋ ءراسىمى ەرەكشە فورماتتا ءوتتى. سپورتشىلار شەرۋى، اكروباتيكالىق قويىلىمدار مەن اسەرلى شوۋ قاتىسۋشىلارعا كوتەرىڭكى كوڭىل-كۇي سىيلادى.
قونايەۆ قالاسىنىڭ اكىمى اسحات بەردىحانوۆ جاس سپورتشىلارعا ساتتىلىك تىلەدى.
«بۇل جارىس – جاي عانا باسەكە ەمەس. بۇل – دوستىقتىڭ، تاباندىلىقتىڭ جانە جەڭىسكە دەگەن جىگەردىڭ الاڭى. بۇگىنگى الاڭدا جۇرگەن ءاربىر جاس سپورتشى – ەرتەڭگى ەل ماقتانىشى، بولاشاق چەمپيون. قالادا بۇقارالىق سپورتتى دامىتۋعا ەرەكشە كوڭىل ءبولىنىپ كەلەدى جانە مۇنداي جوبالار جاس بۋىنعا ۇلكەن سەرپىن بەرەدى»، – دەدى قالا اكىمى.
شارا بارىسىندا قالا اكىمدىگى تاراپىنان جاس سپورتشىلارعا قولداۋ رەتىندە 600 دانا دوپ تارتۋ ەتىلدى.
كەشتىڭ شارىقتاۋ ساتىندە كورەرمەندەر ەرەكشە شوۋعا كۋا بولدى. اسكەري قىزمەتتەگى قالا تۇرعىنى ايدار تەزەكوۆ كۇش ونەرىن كورسەتىپ، شەگەنى اعاشقا قولمەن قاعىپ، گىر تاسىنىڭ ۇستىندە جاتتىعۋ جاساپ، كوپشىلىكتى تاڭعالدىردى. تۇرعىنعا سپورتقا دەگەن سۇيىسپەنشىلىكتى قالىپتاستىرۋ جولىنداعى ەڭبەگى ءۇشىن قالا اكىمىنىڭ العىس حاتى تابىستالدى.
سالتاناتتى ءراسىم بارىسىندا «بولاشاق چەمپيوندار ليگاسىنىڭ» كۋبوگى رەتروكولىكپەن ساحناعا شىعارىلىپ، جارىس رەسمي تۇردە اشىق دەپ جاريالاندى.
اتالعان دودا جاس سپورتشىلارعا ءوز مۇمكىندىگىن كورسەتۋگە، تاجىريبە جيناۋعا جانە ۇلكەن سپورتقا قادام جاساۋعا جول اشپاق.
