«حالىق كەمەلىنە كەلىپ، وركەندەۋى ءۇشىن، ەڭ الدىمەن، ازاماتتىق پەن ءبىلىم كەرەك» دەپ ۇلى ش.ءۋاليحانوۆ وتە ورىندى ايتقان. ەندەشە جان-جاقتى ەل تاريحىن جەتىك بىلەتىن، زامان تالابىنا ساي جاستاردى تاربيەلەۋ – بۇگىنگى كۇن تالابى ەكەندىگىن جادىمىزدان شىعارماعانىمىز ابزال.

 

ەلباسىمىز ن.ءا.نازاربايەۆتىڭ «ءبىزدىڭ جاستارىمىز عىلىم مەن بىلىمگە ۇمتىلىپ، ەلدىڭ بولاشاعىن ويلايتىن بولسا، كەلەشەگىمىز كەمەل، تاۋەلسىزدىگىمىز باياندى بولادى» دەگەن سوزدەرى بولاشاق قازاقستاننىڭ تىزگىنىن ۇستايتىن جاستاردىڭ زامانا كوشىنەن قالماي بىلىكتى دە ءبىلىمدى مامان بولۋدىڭ ايقىن بەينەسى. جالپى توقتالا كەتەتىن بولساق، «ايبىن» اتتى عىلىمي پىكىرسايىس كلۋبى قۇرلىق اسكەرلەرىنىڭ اسكەري ينستيتۋتىندا 2016 جىلدىڭ 16 مامىرىندا رەسمي تۇردە اشىلعان بولاتىن. ونىڭ نەگىزگى ماقساتى – كۋرسانتتاردى شەشەندىك ونەرگە باۋلۋ مەن ۇيرەتۋ، بىلىمدەرى مەن عىلىمي تانىمدارىن ارتتىرۋعا باعىتتالعان اسكەري جاستاردىڭ شىعارماشىلىق الەۋەتىن نەعۇرلىم تولىق جۇزەگە اسىرۋ مەن دامىتۋ بولىپ تابىلادى.

 

مىنە، ءوزىنىڭ اشىلعاننان بەرگى قىسقا تاريحىندا ينستيتۋتتىڭ كلۋب مۇشەلەرى قالالىق، ايماقتىق ءتۇرلى پىكىرسايىس الاڭدارىندا وزدەرىنىڭ بەلسەندىلىكتەرىمەن كوزگە تۇسە ءبىلدى. بۇگىنگى تاڭدا اتالعان كلۋبتىڭ باس ءتوراعاسى 3 كۋرس كۋرسانتى و.شەشحاننىڭ باسشىلىق ەتۋىمەن كلۋبتا جيىرمادان استام كۋرسانتتار س.بەردالى، م.كاريبەكوۆ، و.قۋاندىقوۆ، ب.جۇماعازى، ق.كاكىم، ج.كاريپقان، ب.بالابەك، ق.اۋباتىروۆ، ع.ەلەۋبايەۆ، ا.ماحامبەتالييەۆ، ە.امان، ن.وكتيابر، ا.ۇلبەك، م.تۇرسىنبەك، د.كەنجەبايەۆ، د.مىقتىباي، ە.تاۋباي، د.ورىنباي، د.ماحمۋت، ح.ايتۋعان، ب.امانجول، س.بالابەكتەر كلۋبتىڭ جۇمىسىن جانداندىرىپ كەلەدى. سونىڭ ءبىر ايعاعى مامىر ايىنىڭ 5 مەن 6-شى جۇلدىزى كۇندەرى قۇرلىق اسكەرلەرى اسكەري ينستيتۋتىنىڭ «ايبىن» عىلىمي پىكىرسايىس كلۋبى 7 مامىر – قازاقستان رەسپۋبليكاسىنىڭ وتان قورعاۋشىلار كۇنىنە وراي ۇيىمداستىرىلعان «مىقتى اسكەر – ماڭگىلىك ەل تىرەگى!» تاقىرىبىندا رەسپۋبليكالىق پىكىرسايىس ءتۋرنيرىن وتكىزدى.

 

ءتۋرنيردىڭ وتكىزىلۋ ماقساتى – بولاشاق جاستاردىڭ پاتريوتتىق سەزىمدەرىن ارتتىرۋ ارقىلى، شىعارماشىلىق بەلسەندىلىكتەرى مەن وي-پىكىرلەرىن دامىتۋ جانە ولاردى قوعامنىڭ وزەكتى ماسەلەلەرى بويىنشا پىكىر الماسۋعا شاقىرۋ بولىپ تابىلدى. وتكىزىلىپ وتىرعان تۋرنير ينستيتۋت تاريحى مەن «ايبىن» كلۋبى ءۇشىن العاشقى قادام جانە وزىندىك ماڭىزعا يە بولدى. اتالعان ءىس-شاراعا الماتى قالاسىنان راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ، قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ اكادەمياسىنىڭ، ءال-فارابي اتىنداعى قازاق ۇلتتىق، اباي اتىنداعى قازاق ۇلتتىق پەداگوگيكالىق، س.د.اسفەندياروۆ اتىنداعى قازاق ۇلتتىق مەديسينالىق، ق.ساتپايەۆ اتىنداعى ۇلتتىق تەحنيكالىق-زەرتتەۋ، قازاق ۇلتتىق اگرارلىق، نارحوز، قازاق مەملەكەتتىك قىزدار پەداگوگيكالىق، الماتى ەنەرگەتيكا جانە بايلانىس، الماتى تەحنولوگيالىق، حالىقارالىق بيزنەس، سۋلەيمان دەميرەل اتىنداعى، تۇران ۋنيۆەرسيتەتتەرىنىڭ جانە شىمكەنت، قىزىلوردا، استانا جانە اقتوبە قالالارىنىڭ بەلدى پىكىرسايىس كلۋبتارىنىڭ كۋرسانتتارى مەن ستۋدەنتتەرى قاتىستى.

 

ەكى كۇنگە سوزىلعان اتالمىش ءىس-شارانىڭ ناتيجەسىندە امەريكالىق پارلامەنتتىك فورمات بويىنشا «نارحوز» ۋنيۆەرسيتەتىنىڭ «تاڭداۋلى ەكونوميستەر وداعى» اتتى پىكىرسايىس كلۋبىنىڭ مۇشەلەرى ءا.جۇماباي مەن ج.ساقتاعان ءبىرىنشى ورىندى يەمدەنە وتىرىپ، ينستيتۋت باستىعىنىڭ كۋبوگىن جەڭىپ الدى. ەكىنشى ورىندى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ «پاتريوت» كلۋبى مۇشەلەرى د.اۋەنەك پەن ە.تەمىرالى جانە ءۇشىنشى ورىندى «نارحوز» جانە «تۇران» ۋنيۆەرسيتەتتەرىنىڭ ستۋدەنتتەرى ءا.تويلىباي مەن د.اققوجا جەڭىستى ءوز قانجىعالارىنا بايلادى. لينكولن-دۋگلاس فورماتى بويىنشا «ەڭ ۇزدىك سپيكەر» اتاعىن «نارحوز» ۋنيۆەرسيتەتىنىڭ «تاڭداۋلى ەكونوميستەر وداعى» اتتى پىكىرسايىس كلۋبىنىڭ مۇشەسى ا.سارسەنباي جەڭىسكە جەتىپ، ينستيتۋت باستىعىنىڭ كۋبوگىن جەڭىپ السا، «ۇزدىك سپيكەر» اتاعىن وسى كلۋبتىڭ مۇشەسى ءا.تويلىباي جەڭىپ الدى. سونىمەن قاتار ويىن ەرەجەسى بويىنشا «ۇزدىك تورەشى» اتاعىنا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «اتامەكەن» پىكىرسايىس كلۋبىنىڭ مۇشەسى س.ىدىرىس يە بولدى. شارا سوڭىندا كونسەرتتىك باعدارلاماعا ۇلاستى.