اقش-قا رەسمي ساپارىنىڭ سوڭعى كۇنىندە وزبەكستان پرەزيدەنتى شاۆكات ميرزيايەۆ پەنتاگونعا بارىپ، اسكەري-قورعانىس ۆەدومستۆوسىنىڭ دەليگاسياسىمەن كەزدەستى.

شاۆكات ميرزيەيەۆ اقش قورعانىس ءمينيسترى دجەيمس مەتتيسپەن كەزدەسىپ، ەكى ەل اراسىنداعى اسكەري-تەحنيكالىق سالا بويىنشا سەرىكتەستىك ماسەلەسىن تالقىلادى.

بۇعان قوسا مەتتيس ميرزيايەۆقا اۋعانستاندا ناتو وپەراسياسىن قولداعانى ءۇشىن جانە ەلدىڭ ايماقتاعى كورشىلەرىمەن «ۇيىمشىل» بولعانى ءۇشىن العىس ايتقان.

«ءبىز وزبەكستانمەن تەرروريزممەن كۇرەس جانە شەكارا قاۋىپسىزدىگى سالاسىندا تىعىز ارىپتەستىك ورناتپاقشىمىز»، - دەدى پەنتاگون باسشىسى.

ونىڭ سوزىنشە، ۆاشينگتون مەن تاشكەنت ستراتەگيالىق ارىپتەستىكتىڭ جاڭا ءپوزيتيۆتى كەزەڭىنە جىلجىپ بارادى.

اقش پرەزيدەنتى دونالد ترامپ اق ۇيدە وزبەكستان پرەزيدەنتى شاۆكات ميرزيايەۆتى قابىلدادى. 16 مامىردا وتكەن بۇل كەزدەسۋ شامامەن ءبىر ساعاتقا سوزىلدى. وزبەكستان پرەزيدەنتى 2002 جىلدان بەرى العاش رەت اقش-قا رەسمي ساپارمەن بارىپ وتىر.

اقش باسشىسىمەن كەزدەسۋدە شاۆكات ميرزيەيەۆ ەكى ەلدىڭ قارىم-قاتىناسى جاڭا دەڭگەيگە كوتەرىلگەنىن زور مارتەبەمەن ايتىپ، جوعارى دەڭگەيدە قارسى العان ترامپقا العىسىن ءبىلدىردى.

امەريكا باسشىسى تاشكەنت ۇيىمداستىرعان ەكونوميكالىق جانە قوعامدىق-ساياسي رەفورمالاردى جوعارى باعالاپ، ونىڭ جۇزەگە اسۋى ءۇشىن قول ۇشىن سوزاتىنىن مالىمدەدى.

بۇعان قوسا تاراپتار وڭىرلىك قاۋىپسىزدىك جانە تەرروريزممەن كۇرەس  ماسەلەلەرىن تالقىعا سالدى.

ترامپ شاۆكات ميرزيەيەۆتىڭ ورتالىق ازيادا باستاعان ينتەگراسيالىق ءۇردىسىن قولداپ، «س5+1» فورماتىندا ەلدەرمەن ديالوگقا وتۋگە قاشان دا دايىن ەكەنىن جەتكىزدى.

سونىمەن قاتار اقش اۋعانستانداعى وزبەك تەمىرجولدارى مەن ينفرا قۇرىلىس سالاسىندا ساياسي جانە قوسىمشا كومەك كورسەتۋگە دايىن. ءوز كەزەگىندە شاۆكات ميرزيەيەۆ تە الداعى ۋاقىتتاردا كەز-كەلگەن كومەگىن ۇسىنۋعا دايىن ەكەنىن جەتكىزدى.

اقش پەن وزبەكستان قورعانىس سالاسىنداعى سەرىكتەستىكتى نىعايتىپ، العاشقى بەس جىلدىق اسكەري ارەكەتتەسۋ جوسپارىن جۇزەگە اسىرماق.

باسشىلار وزبەكستانداعى ادام قۇقىقتارى ماسەلەسىن دە شەتىن قالدىرعان جوق. ترامپ تاشكەنتتىڭ ازاماتتاردىڭ قۇقىعىن قورعاۋ ماسەلەسىندەگى ادىلەتتىلىك رەفورماسىن ماقۇلدادى.

وزبەكستان ەلدەگى امەريكالىق كومپانيالارداعى جۇمىسشىلاردىڭ جاعدايىن جاقسارتىپ، ءجىتى باقىلاۋدا ۇستايتىندىعىن ءمالىم ەتتى. باسشىلار اۋىل شارۋاشىلىعى، ەكونوميكا، ەنەرگەتيكا، حيميا، قارجى، تۋريزم، ماتا ءوندىرىسى، دەنساۋلىق ساقتاۋ جانە سيفرلىق تەحنولوگيا سالالارىندا سەرىكتەستىكتى ودان ءارى نىعايتۋ مۇمكىندىكتەرىن قايتا قاراۋعا كەلىستى.

ساپار بارىسىندا وزبەكستان مەن اقش كومپانيالارى 20 شاقتى ءىرى  كەلىسىمشارتقا قول قويدى.  ولاردىڭ جۇزەگە تولىق اسۋى 4،8 ملرد دوللارعا باعالاندى.