مامىر ايىنىڭ سوڭىنا دەيىن ق ر ۇلتتىق بانكى «7-20-25» باعدارلاماسىنىڭ نەگىزگى باعىتتارىن بەكىتەدى. بۇل تۋرالى ق ر ۇلتتىق بانكى ءتوراعاسىنىڭ ورىنباسارى ولەگ سمولياكوۆ ءمالىم ەتتى، دەپ حابارلايدى قازاقپارات.

«مەملەكەت باسشىسىنىڭ يپوتەكانى قولجەتىمدى ەتۋ بويىنشا ءبىرىنشى الەۋمەتتىك باستاماسى باعدارلاماسىن بەكىتۋگە دايىنبىز. مامىر ايىندا اتالعان باعدارلامانىڭ بازالىق ەرەجەسىن قابىلداۋ جوسپارلانعان»، - دەدى و. سمولياكوۆ سەناتتا وتكەن دوڭگەلەك ۇستەلدە.

سونىمەن بىرگە، ۇلتتىق بانك وكىلى باعدارلامانىڭ قۇرىلىمى تۋرالى اڭگىمەلەپ بەردى.

«باعدارلاما 7 پروسەنتتىك مولشەرلەمەدەن، 20 پروسەنتتەن اسپايتىن باستاپقى جارنادان جانە 25 جىلعا دەيىنگى نەسيە مەرزىمىنەن قۇرالعان. مۇنداعى نەگىزگى قاعيدا - مولشەرلەمەنىڭ كوبەيتىلمەۋى، ياعني قارىزدى بەرۋدە، قىزمەت كورسەتۋدە ەشقانداي كوميسسيا الىنبايدى. باستى تالاپ - رەسمي كىرىس كوزىنىڭ بولۋى، ەڭبەك نەمەسە كاسىپكەرلىك قىزمەتىنىڭ راستالۋى. ول ءۇشىن سالىق ورگاندارىنىڭ نەمەسە بجزق انىقتاماسىن اكەلۋگە بولادى. ياعني، بۇل باعدارلاما مەملەكەتتىك قىزمەتكەرلەرگە دە، كاسىپكەرلەرگە دە ارنالعان»، - دەپ ءتۇسىندىردى ول.

«نۇرلى جەر» باعدارلاماسىمەن باسپانا بەرۋدە ءۇي سالۋشىلار نەمەسە اگەنتتەن تىكەلەي ساتىپ الىناتىن جاڭا باسپانالارعا باسىمدىق بەرىلەدى.

«ءبىزدىڭ ويىمىزشا، باعدارلامانىڭ الەۋەتى زور - بەس جىلدا شامامەن تريلليون تەڭگە اينالىمعا تۇسەدى. جىلىنا شامامەن 200 ملرد تەڭگە جاڭا يپوتەكالىق نەسيەلەر راسىمدەلەدى»، - دەيدى ولەگ سمولياكوۆ. بۇعان دەيىن «7-20-25» باعدارلاماسىنىڭ 2018 جىلدىڭ ەكىنشى جارتىسىندا ىسكە قوسىلاتىنى حابارلانعان ەدى.