اتىراۋدا جاستار ەڭبەك بيرجاسى ۇيىمداستىرعان بوس جۇمىس ورىندارى جارمەڭكەسى ءوتتى، دەپ حابارلايدى اتىراۋ وبلىستىق وڭىرلىك كوممۋنيكاسيالار قىزمەتى.

بۇگىن، 18 مامىر كۇنى، «Apec Petrotechnic» جوعارى كوللەدجىندە بوس جۇمىس ورىندارىنىڭ جارمەڭكەسى ءوتتى. جارمەڭكەگە 30-عا جۋىق مەكەمە قاتىسىپ، 600-گە جۋىق بوس جۇمىس ورىندارى ۇسىنىلىپ، تۇيىندەمەلەر قابىلداندى.

ۇيىمداستىرۋشىلاردىڭ ايتۋىنشا، اتالعان شارا جاستاردىڭ، قالا تۇرعىندارىنىڭ جۇمىسپەن قامتىلۋىنا ىقپال ەتۋ، الەۋمەتتىك-ەكونوميكالىق جاعدايىنىڭ كوتەرىلۋىنە جاعداي جاساۋ، جۇمىسسىزدىقتىڭ ستاتيستيكالىق كورسەتكىشتەرىن تومەندەتۋگە باعىتتالعان. 

-بۇل جوبا وڭىردە جىل سايىن وتكىزىلەدى.جىل سايىن جۇمىسقا تۇرۋشى جاستار سانى وسۋدە. بۇگىنگى جارمەڭكەگە 2500-دەن اسا ادام قاتىستى، ولاردىڭ بارلىعى ءوتىنىش بەرىپ، جۇمىسقا تۇرۋ ءۇشىن تۇيىندەمەلەرىن قالدىردى،-دەيدى جاستار رەسۋرستىق ورتالىعىنىڭ باسشىسى سەرىك قادىروۆ.

ايتا كەتەيىك، وتكەن جىلعى جارمەڭكەگە 20-دان استام مەكەمە قاتىسىپ، 1200-دەن اسا ادام جاڭا جۇمىس ورىندارىنا تۇيىندەمە تاپسىرعان بولاتىن. ناتيجەسىندە 250-گە جۋىق ادام جۇمىسقا ورنالاستى.