ماسكەۋدە تەرەزەدەن قۇلاپ، قايتىس بولعان توميريس بايسافانىڭ اتا-اناسى تەرگەۋ جۇمىستارىنىڭ بارىسىن ايتىپ بەردى.

مارقۇمنىڭ اتا-اناسى – دارحان قوجابەرگەنوۆ پەن جاننا احمەتوۆا رەسەيلىك مامانداردان ادىلەتتى ءارى وبەكتيۆتى تەرگەۋدى تالاپ ەتىپ وتىر. رەسەيلىك تەرگەۋ ماماندارىنىڭ بولجامىنشا، قىز ءوز-وزىن ولتىرگەن. الايدا اتا-اناسى بۇل دەرەككە سەنۋدەن باس تارتتى.

«بۇل ءىستىڭ جۇمباعى كوپ. تەرگەۋ ورگاندارى جاساۋى ءتيىس كەي ارەكەتتەر جاسالماي جاتىر. ماسەلەن، مۋرتۋزالي مەدجيدوۆانىڭ اينالاسى عانا تەرگەلىپ جاتىر. اۋديتوريا ىشىندە قىزىم ەكەۋى عانا بولعان. جىگىت بولمەنىڭ ەسىگىن ۇستەلمەن تىرەپ قويادى. نەگە بۇلاي ىستەگەنى بەلگىسىز. اقىل ەسى دۇرىس ەكى ازامات اۋديتورياعا كىرەدى. ءقازىر بىرەۋى جوق، ال ەكىنشىسى ءتىپتى كۇدىكتى رەتىندە تانىلىپ وتىرعان جوق. ول ءقازىر تەك كۋاگەر ەكەن»، - دەدى اشىندى ءتوميريستىڭ اناسى جاننا احمەتوۆا.

13 ساۋىردە بولعان وقيعاعا سايكەس، كۋاگەرلەر قىزدى بىرەۋدىڭ تەرەزەدەن قۇلاتىپ جىبەرگەنىنە سەنىمدى.

«ول بوستاندىقتا ءجۇر. جارتى كۇن ۇستاپتى دا، جىبەرە سالىپتى. ب ا ق وكىلدەرى العاشىندا قىزىمدى بىرەۋدىڭ يتەرىپ جىبەرگەنىن جارىسا جازعان. بىزگە مىنا تەرگەۋ جۇمىستارى بوگەت كەلتىرىپ وتىر. ولارعا مەدجيدوۆ "قىز ءوزى قۇلادى" دەپ سەندىرگەن. تەرگەۋ ورگاندارى سوعان سەنىپ وتىرعان كورىنەدى. ال قىزىمنىڭ دوستارىنان ەشكىم ەشتەڭە سۇراماعان»، - دەدى جاننا احمەتوۆا.

اناسىنىڭ ايتۋىنشا، توميريس بايسافا تەرەزەدەن ارقاسىمەن قۇلاعان. ياعني ءوزىن-وزى ولتىرۋگە بەكىنگەن ادامنىڭ ارەكەتىنە ۇقسامايدى. ساۋساعىنداعى تىرناقتارى سىنعان. اناسى مۇنى "ءتوميريستىڭ بىرنارسەدەن ۇستانىپ قالعىسى كەلگەنىنەن" دەپ بولجايدى. ال توميريس ءتىرى بولعاندا، ەشقانداي تەرگەۋ جۇمىستارى جۇرگىزىلمەگەن كورىنەدى.

توميريس بايسافانىڭ اكەسى جىگىتتىڭ بەدەلدى وتباسىنان شىققانىنا سەنىمدى. بۇل تۋرالى اكەسىنە ماسكەۋ تەرگەۋ ءبولىمىنىڭ قىزمەتكەرلەرى ايتىپ قالعان.

قىزىمەن ءبىر كۇندە بىرنەشە ۋاقىت سويلەسىپ تۇراتىن اناسى قايعىلى وقيعا بولعان كۇنى ساعات 12.42-دە توميريسقا حابارلاما جىبەرگەن. ال دەرەكتەرگە سايكەس، 12.47-دە قىز تەرەزەدەن قۇلاپ كەتىپ، 20 كۇنگە جۋىق رەانيماسيا بولىمىندە جاتادى. جاننا احمەتوۆا ءتىپتى قىزىنىڭ جاقىن دوسى بولعان مەدجيدوۆپەن دە سويلەسكەن.

«ول سول كۇنگى كارتينانىڭ كوز الدىندا ەكەنىن قايتالاپ ايتا بەردى. توميريس ونىڭ كوز الدىندا قۇلاعان ەكەن. قىزىم جان داۋىسىمەن ايقايلاعان. جوق، ءبىز جىگىتكە كىنا ارتپايمىز. تەك تۇپكىلىكتى تەرگەۋدى تالاپ ەتەمىز»، - دەدى جاننا احمەتوۆا.

ەستەرىڭىزگە سالا كەتەيىك، 21 جاستاعى توميريس بايسافا 2018 جىلدىڭ 13 ساۋىرىندە ماسكەۋدەگى وقۋ ورداسىنىڭ تەرەزەسىنەن قۇلاپ كەتەدى. كۋاگەرلەر ونى وزگە بىرەۋدىڭ يتەرىپ جىبەرگەنىنە سەنىمدى. ازىرگە بار كۇدىك ءتوميريستىڭ جاقىن ارالاسقان داعىستاندىق دوسىنا ءتۇسىپ تۇر. كۋاگەرلەردىڭ ايتۋىنشا، قايعىلى وقيعا الدىندا قىز بەن جىگىت سوزگە كەلىپ قالعان.

ال 3 مامىردا قازاقستاندىق ستۋدەنت اۋرۋحانادا كوز جۇمدى.