وتىرارلىق جاس اقىننىڭ "تۇماندى جارعان اي" كىتابىنىڭ تۇساۋكەسەرى مەن شىعارماشىلىق كەشى ءوتتى.
ەلباسى نۇرسۇلتان ءابىش ۇلى نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا كوتەرىلگەن مىندەتتەردى جۇزەگە اسىرۋ وتىرار اۋدانىنداعى جاس سۋرەتشى، قولونەر شەبەرى، اقىن قازاقتىڭ قايسار قىزى اتانىپ كەتكەن تۇرسىناي قايرات قىزىنىڭ «تۇماندى جارعان اي» كىتابىنىڭ تۇساۋكەسەرى مەن «مەن باقىتتى ەكەنمىن» اتتى شىعارماشىلىق كەشى ءوتتى.
ساعىنىش پەن مۇڭنان، تازالىق پەن سۇلۋلىقتان تۇراتىن تۇرسىنايدىڭ ولەڭدەرى كوڭىل تولقىنىن تەربەپ، ادام بالاسىنىڭ جاندۇنيەسىن بىردە مۇڭعا، بىردە شىڭعا سۇيرەپ بەيمازا كۇيگە بولەيتىنى شىندىق. ءوزى جاستايىنان ارباعا تاڭىلسا دا اقىن قىزدىڭ پايىم-پاراساتى جوعارى، تالعامى بيىك، ارمان-ماقساتى شەكسىز. ەڭ باستىسى - ومىرگە قۇشتار جان.
كەش شىمىلدىعى دا اۆتوردىڭ «مەن باقىتتى ەكەنمىن» ولەڭىمەن اشىلدى.
جىر سۇيەر كوپشىلىكتى ليريكالىق ولەڭدەرىمەن سۋسىنداتقان كەشتە اۋدان اكىمى ايتاحانوۆ ەرلان قۋانىش ۇلى جاس تا بولسا تەرەڭ وي قوزعاي بىلگەن قۇندى دا جاڭا كىتاپقا قۇتتى بولسىن ايتىپ، جاڭالىققا، جاسامپازدىققا قۇشتار تۇرسىنايدىڭ شىعارماشىلىعىنا تولاعاي تابىس تىلەپ، اقىن قىزعا ارنايى سىي-سياپات تابىستادى. ال، وتىرار اۋدانىنىڭ قۇرمەتتى ازاماتى، اقىن بەگامان سۇلتايەۆ ءوز لەبىزىن جىر شۋماقتارىمەن جەتكىزىپ، شىعارماشىلىعىنا ساتتىلىك تىلەدى.
كىتاپتىڭ تۇساۋى رەسمي تۇردە كەسىلگەن سوڭ وتىرار ادەبيەت جانە ونەر بىرلەستىگىنىڭ مۇشەلەرى، اقىن-سۋرەتشى، رۋحاني ۇستازى ءادىلحان مالىك، اقىن-ۇستازدار التىناي قاسىمبەك پەن امانكۇل ومار، گاۋحار جۇسىپالييەۆالار جۇرەك جاردى تىلەكتەرىن ءبىلدىرىپ، اقىن قىزعا شىعارماشىلىق تابىس تىلەدى.
شارا بارىسىندا كوپشىلىككە تۇرسىناي قايرات قىزىنىڭ سياسى كەپپەگەن جىرلارى تارتۋ ەتىلىپ، اقىن قىزدىڭ ونەردەگى دوستارى اۋەلەتە ءان سالىپ، جاقۇت جىردان شاشۋ شاشتى.
