نۇرسۇلتان نازاربايەۆ كۋبا رەسپۋبليكاسى مەملەكەتتىك كەڭەسىنىڭ جانە مينيسترلەر كەڭەسىنىڭ ءتوراعاسى ميگەل ماريو دياس-كانەل بەرمۋدەسكە كوڭىل ايتۋ جەدەلحاتىن جولدادى، دەپ جازادى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاسادى.
مەملەكەت باسشىسى گاۆانا قالاسىنىڭ ماڭىندا جولاۋشىلار ۇشاعىنىڭ اپاتقا ۇشىراۋى سالدارىنان كوپتەگەن ادامنىڭ قازا بولعانى تۋرالى حاباردى زور كۇيزەلىسپەن قابىلدادى.
«وسىناۋ قيىن ساتتە، قازا بولعانداردىڭ تۋىستارى مەن جاقىندارىنىڭ، سونداي-اق بارلىق كۋبا حالقىنىڭ قايعىسىنا ورتاقتاسىپ، قازاقستان حالقىنىڭ جانە جەكە ءوزىمنىڭ اتىمنان كوڭىل ايتامىن.
زارداپ شەككەندەردىڭ ءبارىنىڭ تەزىرەك ساۋىعىپ، وتباسىلارىنا ورالۋىنا تىلەكتەستىك بىلدىرەمىن»، – دەلىنگەن ەلباسى جولداعان جەدەلحاتتا.
ايتا كەتەيىك، 18 مامىردا گاۆانا اۋەجايىنان ەلدىڭ شىعىسىنداعى ولگين قالاسىنا ۇشىپ شىققان كۋبا مەملەكەتتىك اۋە كومپانياسىنىڭ Boeing 737 ۇشاعى اۋەگە كوتەرىلە سالىسىمەن كوپ ۇزاماي جەرگە قۇلاعان. كەي دەرەكتەرگە سۇيەنسەك، جولاۋشىلار ۇشاعىندا بولعان جۇزدەن استام ادامنىڭ ۇشەۋى ءتىرى قالعان.
