اق جايىق وڭىرىندەگى الەۋمەتتىك-ەكونوميكالىق دامۋداعى باسىم باعىتتاردىڭ ءبىرى – ەلدى مەكەندەردى گازبەن جابدىقتاۋ. وبلىستى تابيعي گازبەن جابدىقتاۋ نەگىزىنەن ءتورت «ورتالىق ازيا – ورتالىق»، «ورىنبور – نوۆوپسكوۆ»، «قاراشىعاناق – ورال»، «اگرس جىمپيتى-قاراتوبە» ماگيسترالدى قۇبىرى ارقىلى جۇزەگە اسىرىلۋدا.
باتىس قازاقستان وبلىستىق ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى قۋانىش ءشارافۋتديننىڭ ايتۋىنشا، باتىس قازاقستان وبلىسىن گازبەن قامتاماسىز ەتۋ جۇمىستارى 2006-2007 جىلداردان باستاپ قارقىن العان.
-سول جىلدارى «باتىس قازاقستان وبلىسىنىڭ ەلدى مەكەندەرىن گازداندىرۋدىڭ 2006-2008 جىلدارعا ارنالعان ايماقتىق باعدارلاماسىنىڭ» اكىمشىسى وبلىستىق قۇرىلىس باسقارماسى بولدى. اتالمىش باعدارلاما اياسىندا 21 ەلدى مەكەنگە تابيعي گاز جەتكىزىلىپ، سايكەسىنشە ەلدى مەكەندەردىڭ گازبەن جابدىقتالۋ كورسەتكىشى 26%-دى نەمەسە 137 اۋىلدىق ەلدى مەكەندى قۇرادى. سوندا اۋىل تۇرعىندارىن تابيعي گازبەن قامتاماسىز ەتۋ ۇلەسى 45%-دى، ال وبلىسقا شاققاندا 68%-دى قۇرادى. 2008 جىلدان باستاپ ەلدى مەكەندەردى گازداندىرۋ جۇمىستارىن بقو-نىڭ ەنەرگەتيكا جانە تۇرعىن ءۇي كوممۋنالدىق شارۋاشىلىعى باسقارماسى ىسكە اسىرىپ كەلەدى. قازىرگى ۋاقىتتا ورال مەن اقساي قالالارى، وبلىستىڭ 12 اۋدان ورتالىقتارى تۇتاستاي كوگىلدىر وتىنمەن قامتاماسىز ەتىلىپ، جەلىلىك گاز قۇبىرى تارتىلعان جانە ايماقتاعى بارلىق ەلدى مەكەندى گازداندىرۋ جۇمىستارى ودان ءارى جالعاسۋدا،- دەيدى ول.
2008-2017 جىلدارى ارالىعىندا وڭىردەگى 153 ەلدى مەكەنگە تابيعي گاز جەتكىزىلگەن، وعان 25،4 ملرد. تەڭگە قارجى جۇمسالعان. وتكەن جىلدىڭ قورىتىندىسى بويىنشا وبلىس تۇرعىندارىنىڭ گازبەن قامتىلۋ ۇلەسى 94%-دى، ونىڭ ىشىندە اۋىل حالقىنىڭ سانى بويىنشا 88%-عا جەتتى.
بيىل بوكەي ورداسى اۋدانىنىڭ 11، اقجايىق اۋدانىنىڭ 11، جانىبەك اۋدانىنىڭ ءبىر ەلدى مەكەنىنىڭ تۇرعىندارى گازدىڭ راقاتىن كورەدى دەپ كۇتىلۋدە. سوندا وبلىس تۇرعىندارىنىڭ تابيعي گازبەن قامتىلۋ ۇلەسى 95%-عا جەتەدى. سونىمەن قاتار ق ر ەنەرگەتيكا مينيسترلىگىنە جانە بقو ەكونوميكا جانە بيۋدجەتتىك جوسپارلاۋ باسقارماسىنا جالپى قۇنى 3،2 ملرد. تەڭگەنى قۇرايىن بيۋدجەتتىك ءوتىنىم جولدانعان. وسى ءوتىنىم نەگىزىندە بيۋدجەتتىك قاراجات بولىنگەن جاعدايدا، قارالعان قارجىعا زەلەنوۆ اۋدانىنىڭ ءبىر، قازتالوۆ اۋدانىنىڭ 13، تەرەكتى اۋدانىنىڭ 13 ەلدى مەكەنى گازبەن قامتىلادى. سوندا وبلىس تۇرعىندارىنىڭ تابيعي گازبەن قامتىلۋ ۇلەسى 97%-عا، ونىڭ ىشىندە كوگىلدىر وتىنمەن قامتىلعان اۋىل حالقىنىڭ سانى 92%-عا جەتەدى. جالپى گازداندىرۋ جۇمىستارىنىڭ ارقاسىندا تۇرعىنداردىڭ ءومىر ءسۇرۋ ساپاسى جاقسارا تۇسپەك.
