اق جايىق وڭىرىندەگى ىرگەلى ءسۇت وڭدەۋشى «بەرەكە» جشس-نىڭ نارىقتىڭ تالاپتارىنا ساي تەحنيكاسىن، تەحنولوگياسىن جاڭارتۋ جۇمىستارىن تابىستى جۇرگىزۋدە. ەسكى عيماراتىنا دا قايتا جوندەۋ جۇمىستارى باستالعان. جاڭا تەحنولوگيالاردىڭ ەنگىزىلۋىمەن ونداعى شىعارىلاتىن ونىمدەر تۇرلەرى مولايا ءتۇستى. بۇگىندە اتالمىش زاۋىت 30 شاقتى ءسۇت ونىمدەرىنىڭ تۇرلەرىن وندىرەدى.

كاسىپورىن باسشىلىعى شيكىزاتتان تارىقپاس ءۇشىن شارۋاشىلىقتاردى دامىتۋعا ءمان-ماڭىز بەرىپ وتىر.  زەلەنوۆ اۋدانىنداعى ۆولوداركا اۋىلىندا ەت باعىتىنداعى 200 ءىرى قارا باعىلۋدا. بيىلدان باستاپ ءسۇت باعىتىنداعى انالىق مال ۇستاۋ جوسپارلانىپ، مال ازىعىن دايىنداۋعا 450 گەكتار جەر تەلىمى الىندى. كاسىپورىن ەت وڭدەۋ باعىتىن ەكىنشى كەزەككە قالدىرىپ، ءسۇت وڭدەۋ باعىتىنا باسىمدىق بەرۋگە قام-قارەكەت جاساۋدا. ويتكەنى ءوندىرىس ورنى شيكىزاتتان تارىعىپ، تەك جەرگىلىكتى سۇتكە عانا يەك ارتسا، ءسۇت ونىمدەرىن ءوندىرۋدىڭ قيىنعا سوعاتىنىن جاقسى سەزىندى. سوندىقتان بەلگىلى كولەمدە جەرگىلىكتى تابيعي سۇتپەن جانە وسى زاماننىڭ تالابىنا سايكەس باسقا دا ءسۇت ونىمدەرىن شىعارۋدا پايدالانىلاتىن شيكىزاتتارمەن جۇمىستانۋدى كوزدەيدى. ءقازىر «بەرەكەلىكتەر» ءسۇت ونىمدەرىن ءوندىرۋدىڭ تۇراقتى ىرگەتاسىن قالىپتاستىرۋعا جۇمىلعان. 

ەۋرازيالىق وداق شەڭبەرىندە اق جايىق وڭىرىنە دە سىرتتان ءسۇت ونىمدەرى كوپ  تاسىمالدانادى. قاتاڭ نارىقتىق باسەكەلەستىك جاعدايىندا جەرگىلىكتى ءوندىرىسشى «بەرەكە» تەحنيكا، تەحنولوگيا جاعىنان كوشتەن قالىپ قويماي ما دەگەن سۇراعىمىزدى سەرىكتەستىك ديرەكتورى قىمباتبەك ايداروۆقا توتەسىنەن قويدىق.

–  تۇتىنۋشى جەرگىلىكتى ءسۇت ونىمدەرىنىڭ قانداي تەحنيكا، تەحنولوگيامەن شىعارىلاتىنىن بىلمەۋى ىقتيمال، ءبىراق زاماناۋي تەحنولوگيامەن وندىرىلگەن جەرگىلىكتى ونىمدەردى كورگىسى كەلەتىنى زاڭدى. ارينە، بۇل جاعىنان ازىرگە ماقتانا المايمىز. ويتكەنى كۇنى كەشەگە دەيىن ءبىز ءوندىرىسشى رەتىندە  تابيعي ونىمدەرىمىزدى، سونىڭ تەحنولوگياسىن، ساپاسىن ساقتاپ، جوعالتپاۋ باعىتىن ۇستاندىق. مىنە، سول ماقساتىمىزدى ورىندادىق. تۇسىنە بىلگەن ادامعا، بۇل – ءبىزدىڭ قول جەتكىزگەن تۇراقتى دەڭگەيىمىز. «بەرەكەنىڭ» ونىمدەرى بۇرىنعىسىنشا ادام اعزاسىنا پايدالى قاسيەتتەرىن ساقتاپ قالدى. ءبىراق باسەكەنىڭ اتى باسەكە. ساۋدا ورىندارىنداعى سورەلەرگە جايعاسقان ونىمدەردە كاسىپورىننىڭ ۇلەسى سوندىقتان دا ازداۋ شىعار. قازىرگى ۋاقىتتا ونىمدەرىمىز ءوزىمىزدىڭ دۇكەندەردە، بازارلاردا جانە «سۋروۆسكيي»، «ليدەر»، «بايتەرەك» سىندى ءىرى ساۋدا ورىندارىندا تابيعي ءونىم رەتىندە ۇسىنىلۋدا. «بەرەكەنىڭ» ءسۇت ونىمدەرى تابيعي بولعاندىقتان، ءوزىنىڭ قاسيەتىنە ساي نەگىزىنەن 3-5 كۇنگە بۇزىلماي ساقتالادى.  الايدا نارىقتاعى سۇرانىستى ەسكەرە وتىرىپ، ەكىنشى كەزەكتە تازا تابيعي مەن قوسپاسى بار ونىمدەردى شىعارۋعا بەت بۇرۋدامىز. ونداي ونىمدەردىڭ ساقتالۋ مەرزىمى –  ءبىر اي عانا. الايدا ساقتالۋ مەرزىمى التى ايعا شىدايتىن قوسپاسى كوبىرەك ونىمدەردى شىعارۋعا مورالدىق تۇرعىدان تارتىندىق. بۇگىندە 30 كۇنگە دەيىن ساقتالاتىن جاڭا ءونىم ىرىمشىكتىڭ  100، 200، 400، 500 گراممدىق قالبىرداعى جاڭا تۇرلەرى («يانتارنىي»، «درۋجبا»، «استانا» دەپ اتالادى) شىعارىلۋدا. ىرىمشىكتىڭ التى ايعا، ءبىر جىلعا دەيىن بۇزىلمايتىن تۇرلەرىن شىعارۋعا بولادى. الايدا ونىمدەرىمىزدى الىسقا تاسىمالدامايمىز. وڭىردەگى تۇتىنۋشىعا كۇنبە-كۇن ءوندىرىپ، بالعىن تۇرىندە ۇسىنامىز. ءقازىر 100 گراممدىق ىرىمشىكتى تۇتىنۋشىعا ۇسىندىق، ءونىم وتكىزۋدە ەش تۇيتكىل جوق. سونداي-اق بۇرىننان وندىرىلەتىن «بيفيدوك»، «بيفييوگۋرت»، «بيفيلايف» سىقىلدى تابيعي ونىمدەر ءوندىرىسى قاز-قالپىندا ساقتالدى. ارينە، تابيعي ونىمدەر ءوندىرىسىنىڭ وزىندىك كەمشىلىكتەرى دە جوق ەمەس، ولار ۇزاق مەرزىمگە جارامسىز،  تابيعي مايدىڭ جانە ىرىمشىكتىڭ باعاسى سورەدەگى قوسپاسى مول وزگە وسىنداي ونىمدەرگە قاراعاندا ءسال قىمباتتاۋ بولاتىنى تاعى بار. ءبىراق، باستىسى ول ونىمدەر  تابيعي. قايسىسىن تۇتىناتىنىن تۇتىنۋشى ءوزى شەشەدى. قوسپاسى ورتا مولشەردەگى ونىمدەر ءوندىرىسى تەحنولوگياسىن تاجىريبە رەتىندە پايدالانىپ، ونىمدەرى شىعارىلدى، دەگۋستاسيا جاسالدى. بايقاعانىمىز، ونداي ونىمدەر باسەكەگە بەك جارامدى ءارى قۇرامىنداعى قوسپاسىنىڭ ادام اعزاسىنا ەش زيانى جوق، – دەدى قىمباتبەك قادىر ۇلى.    

ءسۇت وڭدەۋ كاسىپورنىنا جاس مامانداردى جۇمىسقا قابىلداۋ، ءوندىرىس ۇردىسىنە تاربيەلەۋ ءجۇمىستارى باسشىلىقتىڭ نازارىندا. تاجىريبەلى ءوندىرىسشى، بىلىكتى باسشى، ۇلتجاندى ازامات قىمباتبەك قادىر ۇلى ءبىر جىلدارى اۋىل-ايماقتى ارالاپ، تەحنولوگ ماماندىعىنا وقىتۋعا ۇل-قىز ىزدەپ، تابا المادى. سودان مەكتەپتى وتە جاقسى بىتىرگەن ءوزىنىڭ ەكى قىزىن ءسۇت ونىمدەرى تەحنولوگىنا الماتىدان وقىتىپ الدى. ءقازىر ونىڭ تۇرمىس قۇرعان قوس قىزى گۇلجان ناسىپقالييەۆا مەن گۇلشات قابدوشيەۆالار كاسىپورىننىڭ بەلدى ماماندارى بولىپ قالىپتاستى. سونىمەن قاتار وندىرىستىك ماشىقتان وتۋگە كەلىپ، وزدەرىن جاقسى قىرىنان تانىتقان ءبىر كەزدەگى ستۋدەنتتەر گۇلجان جۇماعوجييەۆا، اينۇر سارسەنعالييەۆالار بۇگىندە كاسىپورىندا تەحنولوگ قىزمەتىن ءمىنسىز اتقارۋدا.

قورىتا ايتار بولساق، 200-دەي ادامدى تۇراقتى جۇمىسپەن قامتىپ وتىرعان  بقو-داعى «بەرەكە» ۋاقىت كوشىنەن قالماي، بيىكتەرگە ۇمتىلادى.