كاسىپكەر بولۋ ءار ادامنىڭ ماڭدايىنا جازىلعان نەسىبە دەپ ايتا المايمىز. دەسەك تە، ءوز مۇمكىندىگىنە سەنە بىلگەن، العا ۇمتىلعان ءار ازامات نەبىر سىننان سۇرىنبەي ءوتىپ، بيىك بەلەستەردى باعىندىرا الاتىنى انىق.ەلىمىزدە شاعىن جانە ورتا بيزنەستى دامىتۋعا ارنالعان باعدارلامالار بار بولسا دا، ايەل ادامدارعا بيزنەسپەن اينالىسۋ ەكى ەسە قيىن ەكەنى بەلگىلى. وسى ورايدا كاسىبى مەن وتباسىن بىرگە الىپ جۇرگەن نازىكجاندىلار بار. سولاردىڭ ءبىرى - باتىس قازاقستان وبلىسىنىڭ  قازتالوۆ اۋدانىنداعى جالپاقتال اۋىلىنىڭ تۇرعىنى جۇمازيا مولداعالييەۆا.

ول جەتەكشىلىك ەتەتىن «قايسار» سەحى پلاستيكالىق ەسىك-تەرەزە ونىمدەرىن جاساۋمەن اينالىسادى. اتالمىش سەح شىعاراتىن ونىمدەر  اۋدان تۇرعىندارىنا، قالا بەردى ءوڭىر جۇرتشىلىعىنا جاقسى تانىس. كاسىپكەر انانىڭ ءومىر جولىن ايتا كەتسەك، ول مەكتەپ بىتىرگەننەن كەيىن ورال كووپەراتيۆتىك تەحنيكۋمىنا وقۋعا ءتۇسىپ، ونى جاقسى باعامەن ءتامامدايدى. كەيىن تاڭات ەلدى مەكەنىندەگى ازىق-تۇلىك دۇكەنىندە ساتۋشى بولىپ جۇمىس ىستەيدى. 1985 جىلدان باستاپ جالپاقتال اۋىلىنداعى ەت كومبيناتىنا جۇمىسقا كىرىسكەن. مال سويۋ – ايەل ادامنىڭ ءىسى ەمەس ەكنى بەلگىلى. دەسە دە، ون جىلداي وسى جۇمىستى ادال اتقارادى. كومبيناتتا ءجۇرىپ بولاشاق جارى جۇباندىقتى كەزىكتىرىپ، تۇرمىس قۇرادى. ەكەۋى ەگىز قوزىداي قول ۇستاسىپ، ومىردە كەزدەسكەن بارلىق اۋىرتپالىقتاردى بىرگە وتكەرىپ كەلەدى. قوس ۇل مەن قوس قىز تاربيەلەپ ءوسىردى. بۇگىندە ولاردىڭ بار لىعى دا بالالى-شاعالى.

جۇمازيا مولداعالييەۆانىڭ ايتۋىنشا، پلاستيكالىق بۇيىمدار سەحىن اشۋعا ۇلكەن ۇلى سەبەپكەر بولعان. ول وقۋىن بىتىرگەن سوڭ ورالعا بارىپ پلاستيكالىق تەرەزە مەن ەسىك جاسايتىن كاسىپكەرلىك سالاسىندا سەگىز جىلداي جۇمىس جاساعان.

-بالام ىلعي دا اۋىلىمىزدان پلاستيكالىق بۇيىم جاسايتىن سەح اشساق دەپ ارماندايتىن. بالالارىممەن اقىلداسا وتىرىپ، «قايسار» اتتى سەحتى اشتىم. وندا ءقازىر ەكى ۇلىم قىز-مەت جاسايدى. پلاستيكالىق ەسىك- تەرەزەلەرگە تاپسىرىس نەگىزىنەن اۋىل تۇرعىندارىنان تۇسۋدە. باسىندا قالاي بولار ەكەن، ونىمدەرىمىز وتەر مە ەكەن دەپ الاڭدايتىنبىز. شىعارعان ونىمدەرىمىز اۋىلداستارىمىزدىڭ كوڭىلىنەن شىعىپ، اۋىل-ايماقتان، وزگە اۋدانداردان بىرتىندەپ تاپسىرىستار دا تۇسە باستادى. سونداي-اق قۇرىلىسى ءجۇرىپ جاتقان عيماراتتارعا دا تاپسىرىس قابىلدايتىن بولدىق، – دەيدى كەيىپكەرىمىز.

ءبىر ەرەكشەلىگى، بۇل سەح ونىمدەرىن اۋىل ارداگەرلەرىنە جەڭىلدىكپەن جاساپ بەرەدى. ونىمدەرگە جاز ايلارىندا تاپسىرىستار وتە كوپ بولادى ەكەن. سول كەزدە بۇل سەحقا قوسىمشا ءۇش-تورت جۇمىسشى الىنادى. مولداعالييەۆتەر وتباسىن كاسىپكەرلەر وتباسى دەۋگە بولادى. ياعني جۇمازيا اپايدىڭ جارى، اۋىلدىڭ سىيلى ازاماتى جۇباندىق اعا 2012 جىلى «جۇباندىق» اتتى شارۋا قوجالىعىن قۇرعان. شارۋا قوجالىعىندا 400 باس قوي مەن ءىرى قارا مالى بار. قوجالىق باسشىسىنىڭ ايتۋىنشا، قىرقىلعان قوي ءجۇنىن قولونەرمەن اينالىساتىن اۋىل ادامدارىنا تەگىن بەرەدى. قوي مەن سيىردان الىنعان ەت، ءسۇت، ماي ونىمدەرىن ۇلى ساعىندىق اشقان «كاۋسار» اتتى دۇكەندە ساتتىققا شىعارادى. وسىلايشا مولداعالييەۆتەر اۋلەتى اۋىل-ايماقتى، ەلىمىزدى دامىتۋعا ءوز ۇلەستەرىن قوسىپ كەلەدى.