وڭتۇستىك قازاقستان وبلىسى شاردارا اۋدانى جاعاجاي ءتۋريزمىن دامىتۋعا قولايلى ايماق. شاردارا سۋ قويماسى جاعالاۋىنداعى تۋريزم سالاسىن دامىتۋ بويىنشا ءتيىستى جۇمىستار اتقارىلۋدا. الداعى ۋاقىتتا 255 گەكتار اۋماقتا 60 نىسان قۇرىلىسى جۇرگىزىلەدى. اتاپ ايتقاندا، قوناق ۇيلەر، ياحت كلۋب، رەستوراندار، اڭشىلار جانە بالىقشىلار ءۇيى، اكۆاپارك سىندى عيماراتتار بوي كوتەرەدى. بۇگىن بۇل تۋرالى وقو وڭىرلىك كوممۋنيكاسيالار قىزمەتىندە وتكەن بريفينگتە شاردارا اۋدانىنىڭ اكىمى بولاتبەك قىستاۋوۆ ءمالىم ەتتى، دەپ جازادى Qamshy.kz اقپارات اگەنتتىگى وقو اكىمدىگىنىڭ باسپا ءسوز قىزمەتىنە سىلتەمە جاساپ.
اۋدان باسشىسىنىڭ ايتۋىنشا، تۋريستىك اۋماققا تارتىلاتىن ينۆەستيسيا كولەمى 6،7 ملرد. تەڭگەنى قۇرايدى. اتالعان جوباعا ينۆەستورلار قىزىعۋشىلىق تانىتۋدا. بۇل جۇمىستار ىسكە اسقان جاعدايدا 1000-نان استام جاڭا جۇمىس ورنى اشىلىپ، بىرنەشە نىسان بوي كوتەرەتىن بولادى. ناتيجەسىندە وڭىرگە كەلۋشى تۋريستەردىڭ سانى 45 مىڭنان اسادى دەپ جوسپارلانۋدا.
بۇدان بولەك، شاردارا اۋدانىندا 19 كاسىپورىن جۇمىس جاسايدى. وتكەن جىلى وسى ءوندىرىس ورىندارىندا 7844،5 ملن. تەڭگەنىڭ ءونىمى ءوندىرىلىپ، 2016 جىلمەن سالىستىرعاندا 4،7 پايىزعا ارتقان. «يندۋستريالدى-يننوۆاسيالىق دامۋ باعدارلاماسى» اياسىندا وسى ۋاقىتقا دەيىن اۋداندا جالپى قۇنى 1482 ملن. تەڭگەنى قۇرايتىن 5 جوبا ىسكە اسىرىلدى.
«اعىمداعى جىلى ونەركاسىپ ءونىمىن 8960 ملن.تەڭگەگە جەتكىزۋ جوسپارلانعان. «يندۋستريالدى-يننوۆاسيالىق دامۋ باعدارلاماسى» شەڭبەرىندە اۋدانعا ينۆەستيسيا تارتا وتىرىپ، اعىمداعى 3 بىردەي جوبانى ىسكە اسىرۋ كوزدەلىپ وتىر. ولاردىڭ قاتارىندا جالپى جوبالىق قۇنى 200 ملن. تەڭگەنى قۇرايتىن وندىرىستىك قۋاتتىلىعى 600 توننالىق «بايتەرەك ببم» جشس-ڭ «بالىق وڭدەۋ زاۋىتىنىڭ قۇرىلىسى» بار. قازىرگى تاڭدا قۇرىلىس جۇمىستارىنىڭ 70 پايىزى اياقتالعان. سونداي-اق، وندىرىستىك قۋاتتىلىعى 20 مىڭ توننانى قۇرايتىن «اي-كاجى» اك-التىن» جشس-ڭ «ماقتا وڭدەۋ زاۋىتىنىڭ قۇرىلىسى» جوباسى بار. ءۇشىنشىسى، «شاردارا گەس» اق-نىڭ قايتا جاڭعىرتۋ جوباسى. اتالعان جوبالاردى ىسكە قوسۋ ارقىلى 400 ادامعا جاڭا جۇمىس ورنى اشىلادى»، - دەدى بولاتبەك دۇيسەنبەك ۇلى.
سونداي-اق، «بيزنەستىڭ جول كارتاسى-2020» كاسىپكەرلىكتى قولداۋ جانە دامىتۋ ءبىرىڭعاي باعدارلاماسى اياسىندا اۋداندا وتكەن جىلى 14 جوباعا قولداۋ كورسەتىلىپ، وڭىرلىك ۇيلەستىرۋ كەڭەسىمەن ماقۇلدانعان.
