پوليسيا قىزمەتكەرلەرى «ساياحات» اۆتوۆوكزالى اۋماعىندا كولىك استىنا تۇسكەن الماتىلىق قىزدىڭ ارىزى بويىنشا رەيد جۇرگىزدى. الماتى ءىىد بەرگەن حابارلاماعا سۇيەنسەك، قىزدىڭ پوليسەيلەرگە ايتقان اقپاراتى راستالماي شىقتى.

«بيىلعى جىلدىڭ 1 مامىرىندا سوتقا دەيىنگى تەرگەۋ جۇرگىزۋ كەزەڭىندە ءىىد ۇيىمداسقان قىلمىسپەن كۇرەس باسقارماسىنىڭ باسشىلىعى مۇددەلى قوعامدىق ۇيىمداردىڭ وكىلدەرى جانە قۇقىق قورعاۋشىلارمەن بىرگە ارىزدانۋشى ءوزىن كۇشتەپ ۇستادى دەپ كورسەتكەن مەكەنجايدا رەيد جۇرگىزدى. اقپارات راستالعان جوق، كورشىلەردىڭ ايتۋىنشا، بۇل مەكەنجايدا كىشكەنتاي بالالارى بار وتباسى تۇرادى»، - دەپ جازىلدى الماتى ءىىد حابارلاماسىندا.

ايتا كەتەيىك، مامىردىڭ باسىندا سايتىمىزدا سەكس-قۇلدىقتان قاشىپ شىعىپ، بازارداعى حالىقتان كومەك سۇراعان قىزدىڭ ۆيدەوسى جاريالانعان ەدى.

قىزدىڭ ايتۋىنشا،  2018 جىلدىڭ 6 مامىرىندا ساعات شامامەن 18.00-دە الماتى قالاسىنداعى ءسۇيىنباي داڭعىلىندا ونى اۆتوكولىك قاعىپ كەتەدى. كەيىن بىرەۋلەر ونى زاڭسىز ۇستاپ، جەزوكشەلىكپەن اينالىسۋعا ماجبۇرلەگەن. ال تەرگەۋ جۇمىستارىنا سايكەس، ن. ەسىمدى الماتىلىق بويجەتكەن 2009 جىلدان بەرى جەزوكشەلىكپەن اينالىسقان تۇلعا رەتىندە ۇيىمداسقان قىلمىسپەن كۇرەس باسقارماسىنىڭ قىلمىستىق ەسەبىندە تۇرعانى انقىتالادى. بۇعان قوسا، ونىڭ جەزوكشەلىكپەن اينالىساتىنداردى جانە ولارعا قىزمەت ەتەتىن پريتوندار مەن ورىنداردى انىقتاپ، جويۋ ماقساتىندا جۇرگىزىلگەن جەدەل-پروفيلاكتيكالىق شارالار مەن رەيدتەردىڭ ناتيجەسىندە ىشكى ىستەر ورگاندارىنا جەتكىزىلگەنى بەلگىلى بولدى.

قازىرگى تاڭدا تەرگەۋ باسقارماسى، سونداي-اق ۇيىمداسقان قىلمىسپەن كۇرەس باسقارماسى ءىستىڭ ناقتى ءمان-جايىن جانە كەلتىرىلگەن مالىمەتتەردىڭ راس-وتىرىگىن انىقتاۋ بويىنشا كەشەندى شۇعىل جانە تەرگەۋ شارالارىن جۇرگىزىپ جاتىر. زارداپ شەگۋشى «كۋاگەرلەردى قورعاۋ» باعدارلاماسى بويىنشا كۇزەتكە الىندى.