شىمكەنت قالاسىنىڭ اكىمى قالانىڭ باس جوسپارىنا سايكەس شاھاردىڭ ەگجەي-تەگجەي جوسپارىن ىسكە اسىرۋدىڭ كەشەندى جوباسىنا قول قويدى. شىمكەنتتىڭ باس جوسپارىن وزەكتەندىرۋدىڭ بىرنەشە سەبەبى بار. ماسەلەن، قالادا جوسپارعا ساي كەلمەيتىن قۇرىلىس نىساندارى كەزدەسەدى، ءبىرقاتار ۇيلەر اۋىل شارۋاشىلىعى سالاسىنا ارنالعان جەردە سالىنعان.

ايتا كەتەيىك، بۇعان دەيىن شاھار جوسپارىنىڭ ەگجەي-تەگجەي جوباسى قالا اكىمى نۇرلان ساۋرانبايەۆتىڭ سىنىنا ۇشىراعان بولاتىن. سەبەبى، جوبانى اۆتورلارىمەن بىرگە تالقىلاعان كەزدە ونىڭ قالا اۋداندارىنا ساي كەلمەيتىنى انىقتالعان بولاتىن. "سىزدەر بۇل اۋماقتاردا ادامدار تۇراتىنىن ەسەپكە الماعانسىزدار. شاعىناۋدان تۇرعىندارىنىڭ جاعدايى قارالماعان. بۇل جۇمىستى قابىلداي المايمىن" – دەگەن ەدى اكىم. جالپى، شىمكەنتتىڭ باس جوسپارىن وزەكتەندىرۋ جۇمىسى ءۇش جىل كولەمىندە ءجۇردى.

- باس جوسپارعا ساي كەلمەيتىن تۇرعىن ۇيلەر 30 پايىزدى قۇرايتىن. ياعني، باس جوسپاردا بۇل ۇيلەر كورسەتىلمەگەن. بۇل دەگەنىمىز - تۇرعىندار ينجەنەرلىك ينفراقۇرىلىمدار مەن جولدار جۇرگىزە المادى. ولار تۇرعىلىقتى جەرىندە تىركەلە المادى جانە سونىڭ سالدارىنان ەمحاناعا نەمەسە مەكتەپكە دە بەكىتىلمەدى. بۇل اۋدانداردىڭ بولاشاعى جوق ەدى، - دەپ اتاپ ءوتتى شىمكەنتتىڭ باس ساۋلەتشىسى نۇرلان ارحابايەۆ.

جوسپاردى وزەكتەندىرۋ قالاعا قوسىلعان كوپتەگەن ەلدىمەكەندەردىڭ جوباسىن ەگجەي-تەگجەيلى قاراستىرۋعا مۇمكىندىك بەرەدى. ال باس جوسپار – قالانى دامىتۋدىڭ ۇزاق مەرزىمدى تۇجىرىمدامالىق باعدارلاماسى.