وبلىس اكىمى التاي كولگىنوۆ وبلىس ورتالىعىنداعى جول، قۇرىلىس جانە اباتتاندىرۋ جۇمىستارى بويىنشا جيىن وتكىزدى. وسى ايدا التاي سەيدىر ۇلى ورالدىڭ ءبىرقاتار قۇرىلىس نىساندارىن ارالعان ەدى.  اتاپ ايتقاندا، اقتوبە، م.مامەتوۆا، پەتروۆسكيي كوشەلەرىندەگى كۇردەلى جول جوندەۋ جۇمىستارىمەن تانىستى.

سونىمەن قاتار، دەپو كوپىرىنىڭ قۇرىلىسى مەن № 2 جىلۋ ماگيسترالىن (كەردەرى، م.مامەتوۆا كوشەلەرى) قايتا قۇرۋ جۇمىستارىن كوردى. وتكەن اپتادا ەلوردانىڭ 20 جىلدىعىنا وراي سالىنىپ جاتقان سكۆەر قۇرىلىسىن قاراعان ەدى.
كەيىنگى جىلدارى ورال قالاسىن كوركەيتۋ جۇمىستارىنا بولىنەتىن قارجى كولەمى ۇلعايىپ كەلەدى. مىسالى ءبىر عانا جول جوندەۋ جۇمىستارىنا 2010 جىلى تەك 500 ملن. تەڭگە بولىنسە، 2017 جىلى ورالدىڭ ىشكى جولدارىنا 8 ملرد.تەڭگە قارجى قاراستىرىلدى. وسىنىڭ ناتيجەسىندە 60-تان استام كوشە جوندەلىپ، 50-گە جۋىق اۋلالار اباتتاندىرىلعان بولاتىن. قالاداعى 29 الەۋمەتتىك نىسانعا باراتىن جول سالىنعان. 
وتكەن اپتادا قالاداعى جول جوندەۋ جۇمىستارى مەن كوپىر قۇرىلىسىنىڭ قارقىنىن باقىلاپ قايتقان وبلىس اكىمى التاي كولگىنوۆ جيىندا ءبىرقاتار مەردىگەردىڭ جۇمىستارىنا كوڭىلى تولمايتىنىن جەتكىزدى. 
– مەردىگەرلەر، سىزدەر تەگىن جۇمىس ىستەپ جاتقان جوقسىزدار. سىزدەردىڭ شالقىپ جۇرگەندەرىڭىز مەملەكەتتىك تاپسىرىستىڭ ارقاسىندا. ەگەر تاپسىرىس بولماسا، بيزنەستەرىڭىز دە ەشتەڭە دە جوق. سوندىقتان جۇمىسقا دا جاۋاپتى قاراۋ كەرەكسىزدەر. جوندەۋ جۇمىستارى كەزىندە جولداردى جاۋىپ قوياسىزدار دا باياۋ قيمىلدايسىزدار. بۇل تۇرعىنداردىڭ نارازىلىعىن تۋدىرادى. ءبىز – اكىمدىك تۇرعىنداردىڭ الدىندا بەرگەن ۋادەمىزگە سايكەس ءتيىستى قاراجاتتى تاۋىپ بەرىپ وتىرمىز. سول قاراجاتقا ساي ساپالى جۇمىس كورسەتۋ – سىزدەردىڭ مىندەتتەرىڭىز. ال سىزدەر ءبىر ەمەس، بىرنەشە قۇرىلىس نىسانىنا بىردەن كىرىسەسىزدەر. سايكەسىنشە، ساپاسىز دۇنيە شىعادى. كوتەرە المايتىن شوقپاردى بەلدەرىڭىزگە بايلاماڭىزدار! ەرتەڭ ۋاقىتىنان كەشىكتىرسەڭىزدەر دە، ساپاسىز جول سالساڭىزدار دا تۇرعىندار ءبىزدى كىنالايدى. سوندىقتان نىساندى قابىلداعاندا قاتاڭ قاداعالاناتىنىن وسى باستان ەسكەرتكىمىز كەلەدى، – دەدى التاي كولگىنوۆ.

وسى جيىندا وبلىس اكىمى ورال قالاسىنىڭ جولدارىن جوندەۋگە قوسىمشا تاعى 1 ميلليارد تەڭگە بولىنەتىنىن جەتكىزدى.

ايتا كەتۋ كەرەك، بىلتىر ءوز ىسىنە ءجۇردىم-باردىم قاراعان 7 بىردەي كومپانيانىڭ ءىسى سوتقا جولدانعان بولاتىن. ءوز كەزەگىندە مەردىگەر كومپانيا باسشىلارى جۇمىستارىن ساپالى اتقارۋعا ۋادە ەتتى.