قاسيەتتى رامازان ايىندا اقتاۋداعى №26 «قارلىعاش» بوبەكجايىندا «قايىرىمدىلىق – ادامگەرشىلىك بەلگىسى» اتتى جارمەڭكە ءوتتى، دەپ حابارلايدى Qamshy.kz اقپارات اگەنتتىگى. 

جارمەڭكەدەن تۇسكەن  549 220 تەڭگە استانالىق اليما كوپەي ەسىمدى ءبىر جاس بەس ايلىق قىزدىڭ ەمىنە جىبەرىلدى.  ءقازىر ول سەۋل قالاسىندا حيميوتەراپيا كۋرسىنان وتۋدە.

اليما قاتەرلى ىسىك دەرتىنە شالدىققان. دارىگەرلەر تولىق ساۋىعىپ كەتەتىنىنە كەپىلدىك بەرمەگەن.  اليمانىڭ اتا-اناسى قىزىن اقش، گەرمانيا، يسپانيا ەلدەرىنىڭ بىرىندە ەمدەتۋگە نيەتتى. وعان كەتەتىن قارجى 100 مىڭ ەۋرودان باستالادى. قوماقتى قاراجاتتى جيناۋ ءۇشىن قازاقستاندىقتار قولدارىنان كەلگەنشە كومەكتەسىپ جاتىر. بۇل ساۋاپتى ىستەن اقتاۋداعى بالاباقشالارى دا تىس قالمادى.   

اقتاۋ قالاسى № 26 «قارلىعاش» بوبەكجايىنىڭ ديرەكتورى گۇلنار شىنعالييەۆانىڭ ايتۋىنشا، ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان «تۋعان جەر» باعدارلاماسىن جۇزەگە اسىرۋ اياسىندا قالالىق ءبىلىم ءبولىمىنىڭ ءىس-شارالار جوسپارىنا سايكەس، سونداي-اق استانا قالاسىنىڭ 20 جىلدىعى جانە اقتاۋ قالاسىنىڭ 55 جىلدىعىنا وراي قايىرىمدىلىق جارمەڭكەسى وتكىزىلىپ وتىر. وعان شاھارداعى بارلىق مەملەكەتتىك بالاباقشالار قاتىستى. 

«قازاق اۋەلدەن جەتىمىن جىلاتپاعان حالىق ەكەندىگى بەلگىلى. ارامىزدا جانى جومارت جاندار از ەمەس، قالتاسى قالىڭ ازاماتتار قول ۇشىن سوزىپ جاتقاندىعى قۋانتادى. ساتىلىمعا شىعارىلعان تاتتىلەر، كيىم-كەشەكتەر، اشەكەي بۇيىمداردى ساتىپ الۋعا اتا-انالار، بالاباقشا تاربيەشىلەرى مەن قالا تۇرعىندارى بەلسەندىلىك تانىتتى. بارىنشا قارجى جيناۋعا كومەكتەرىن ايامادى جانە كىشكەنتاي اليما قىزىمىزدىڭ ساۋىعىپ كەتۋىنە شىن تىلەكتەرىن جەتكىزدى. بۇل شاراعا «جانەل» جەكەمەنشىك بوبەكجايى دا بەلسەندى قاتىسىپ، جارمەڭكە ۇيىمداستىردى»، - دەدى گۇلنار شىنعالييەۆا.

ايتا كەتۋ كەرەك، ساتىلىمعا شىعارىلعان ونىمدەرىنىڭ دەنى بالاباقشا تاربيەلەنۋشىلەرىنىڭ قولىمەن جاسالعان. اتاپ ايتقاندا ءتۇرلى توقىما بۇيىمدارى، شاشقا تاعاتىن زاكولكا، مونشاق، بانتيك، شۇلىقتار. كونديتەردىك ونىمدەر (تورت، بيسكۆيت، ءبالىش، قۇيماق)، كيىم-كەشەكتەر، كادەسىيلار، ويىنشىقتاردى ساتىلىمعا شىعارىلدى. جارمەڭكەدەن تۇسكەن 550.000 تەڭگە اليمانىڭ وتباسىنىڭ شوتىنا اۋدارىلدى.

شارا اياسىندا بۇلدىرشىندەر ءان ايتىپ، بي بيلەپ ءوز ونەرلەرىن كورسەتتى. سونىمەن قاتار، جارمەڭكەگە بەلسەندى قاتىسقان بالاباقشا ۇجىمىنا اقتاۋ قالالىق ءبىلىم ءبولىمىنىڭ اتىنان العىس حات تابىستالدى.   

كامشات ءىزباساروۆا