جۇمىس ساپارى بارىسىندا باۋىرجان بايبەك قالانىڭ ءبىرقاتار كوشەلەرىن ارالاپ كوردى جانە ولاردى اباتتاندىرۋ جونىندە ناقتىلى تاپسىرمالار بەردى.

مەگاپوليس باسشىسى قالداياقوۆ كوشەسىنىڭ شىعىسىنا قاراي گوگول مەن ايتەكە بي كوشەسى اراسىنداعى تروتۋاردى قالپىنا كەلتىرۋدى تاپسىردى، مۇندا نىساننىڭ مەنشىك يەلەرى جاياۋ جۇرگىنشىلەرگە كەدەرگى كەلتىرەتىن كولىك تۇراعىن جاساپ العان.

ءتيىستى باسقارماعا قوعامدىق ايماقتى كولىك تۇراعىنا اينالدىرعان ابدۋللين مەن گوگول كوشەلەرى بۇرىشىنداعى قۇرىلىستى سالىپ جاتقاندارعا قاتىستى شارا قولدانۋ تاپسىرىلدى. جاياۋ جۇرگىنشىلەرگە باسىمدىق بەرە وتىرىپ اتالعان ايماقتى كورىكتەندىرۋ جۇمىستارىن قۇرىلىس كومپانياسى ءوزىنىڭ جەكە قارجىسى ەسەبىنەن اتقاراتىن بولادى.

اعىمداعى جوندەۋ جۇمىستارى كەزىندە گوگول كوشەسى بويىمەن قالداياقوۆ كوشەسىنەن ورتالىق مادەنيەت جانە دەمالىس پاركىنە دەيىن اباتتاندىرۋ جۇزەگە اسىرىلادى. سونىمەن قاتار، جۇرگىنشى قوزعالىسىن قيىنداتاتىن زاڭسىز قرلىسىتاردىڭ بارلىعى الىنادى. ايتا كەتەرلىگى، بۇرىن قالداياقوۆ كوشەسىنەن جەلتوقسان كوشەسىنە دەيىنگى ۋچاسكە جوندەلگەن ەدى.

بيىلعى جازدا الماتىدا 150-دەن استام كوشە، 30 كم تروتۋار مەن 600 اۋلا قايتا جاسالادى. جەر استى وتپەلى جولداردىڭ بارلىعى كۇردەلى جوندەلەدى، جاڭا فونتاندار سالۋ جوسپارلانعان. بۇرىن قايتا جاسالعان پانفيلوۆ، جىبەك جولى، گوگول، قابانباي باتىر، بايسەيىتوۆا، تولەبايەۆ كوشەلەرى مەن «استانا» الاڭىنان وزگە قالانىڭ ءبىرقاتار نەگىزگى داڭعىلدارى جاڭارادى.