مەملەكەت باسشىسىنا ورتالىقتىڭ جەتەكشى ستارتاپ جوبالارى («Chocofamily» كومپانيالار توبى، Nommi جوباسى جانە SmartSatu پلاتفورماسى) تانىستىرىلدى. ولار تاعامعا تاپسىرىس بەرۋ جانە اۋە بيلەتتەرىن ساتۋ جونىندەگى ينتەرنەت-گيپەرماركەت، تاۋار جەتكىزۋشىلەر مەن تۇتىنۋشىلار اراسىنداعى تاۋار اينالىمىنا ارنالعان الاڭ، سونداي-اق بۇكىل الەم بويىنشا ينتەرنەتكە جىلدام ءارى مەيلىنشە ىڭعايلى قوسىلۋدى كوزدەيتىن Wi-Fi روۋتەر ازىرلەمەسى رەتىندە جۇمىس ىستەيدى.
ەلباسى مەملەكەت تاراپىنان «سيفرلىق قازاقستان» باعدارلاماسىنىڭ ىسكە اسىرىلۋىنا زور ءمان بەرىلىپ وتىرعانىن اتاپ ءوتتى.
– ارنايى مينيستر مەن ۆيسە-پرەمەر تاعايىندالدى، ءار مينيسترلىكتە وسى ماسەلەلەرمەن اينالىساتىن ادامدار بار. ءبىز الەمدە بولىپ جاتقان ۇدەرىستەن قالىپ قويماۋىمىز كەرەك. ءبىز سيفرلاندىرۋدىڭ ارقاسىندا، اسىرەسە، ءوندىرۋشى كومپانيالاردىڭ ەڭبەك ونىمدىلىگىن جىلدام ارتتىرا الامىز دەپ ۇمىتتەنەمىن، – دەدى قازاقستان پرەزيدەنتى.
«Chocofamily» ينتەرنەت حولدينگىنىڭ نەگىزىن قالاۋشىلاردىڭ ءبىرى ءارى باس ديرەكتورى راميل مۋحورياپوۆ نۇرسۇلتان نازاربايەۆقا ءىت-سالاسى مەن جالپى سيفرلاندىرۋ ۇدەرىسىنە زور ءمان بەرىپ وتىرعانى ءۇشىن العىس ايتتى.
– ءبىز ءىت-قوعامداستىعى اتىنان «سيفرلىق قازاقستان» باعدارلاماسى ءۇشىن وزىڭىزگە شىنايى ريزاشىلىق بىلدىرەمىز. ءبىز سونىڭ ارقاسىندا وركەندەپ كەلەمىز. اقپاراتتىق تەحنولوگيالاردان باسقا بىردە-بىر سالا مۇنداي جىلدامدىقپەن دامي المايدى. ءبىز قازاقستانداعى ينتەرنەت نارىقتىڭ كوشباسشىسى بولىپ قانا قويماي، حالىقارالىق دەڭگەيگە دە جەتىپ، ۇلكەن كومپانيالار قۇرا الاتىنىمىزعا سەنىمىمىز زور، – دەدى كومپانيا باسشىسى.
ەلباسىنا مەملەكەتتىك قىزمەت كورسەتۋ رەگلامەنتتەرىمەن قامتىلماعان، قالىپتان تىس ومىرلىك احۋالدى رەتتەۋ جونىندەگى «Openاlmaty» قوعامدىق قابىلداۋ ورنىنىڭ جۇمىسى تانىستىرىلدى. وعان 7 ايدىڭ ىشىندە 18 396 ءوتىنىش ءتۇسىپ، ولاردىڭ 78 پايىزى سول جەردە جەدەل شەشىمىن تاپتى.
SmArt.Point جوباسى – الماتىداعى تەحنولوگيالاردى دامىتۋعا ارنالعان كەڭىستىك. وندا جوعارى تەحنولوگيالار مەن كرەاتيۆتى بيزنەس سالاسىندا جۇمىس ىستەيتىن 40 كومپانيا ورنالاسقان. ولاردىڭ جيىنتىق اقشا اينالىمى 100 ميلليون دوللاردان اسادى. قىزمەت ەتۋ باعىتتارى ەلەكتروندى ساۋدا، قارجى تەحنولوگياسى، اۆتوماتتاندىرىلعان لوگيستيكا، مەديا، كومپيۋتەرگە ارنالعان باعدارلامالاردى ازىرلەۋ، تەلەكوممۋنيكاسيا، بلوكچەين، زاڭگەرلىك جانە بۋحگالتەرلىك قىزمەت كورسەتۋ اۋتسورسينگى، ءبىلىم تەحنولوگيالارى سياقتى سالالاردى قامتيدى.
IT-حاب جالپى كولەمى 9000 شارشى مەتردى قامتيتىن ەكى قاباتتى عيماراتتا ورنالاسقان. مۇندا ءبىر مەزگىلدە جەكە ورىنداردى نەمەسە 7-8 قىزمەتكەرگە ارنالعان وفيستەردى جالعا الاتىن 700 ادامعا دەيىن جۇمىس ىستەي الادى.
بۇل نىسان اپتانىڭ جەتى كۇنىندە 24 ساعات بويى اشىق تۇرادى. مۇندا كەلىسسوز جۇرگىزۋگە ارنالعان بولمەلەر، ويىن الاڭدارى جانە سپورت زالى بار. ءارتۇرلى ماماندىق پەن سالالاردىڭ وكىلدەرىن بىرىكتىرەتىن ورتالىق كوۆوركينگ قاعيداتى بويىنشا سالىنعان.
پىكىر قالدىرۋ