مەملەكەت باسشىسى مەديسينا ورتالىعىنىڭ قىزمەتىمەن تانىسىپ، كلينيكا ۇجىمىمەن اڭگىمەلەستى.

– دارىگەر ەمدەلۋشىگە قامقورلىقپەن قاراپ، اسىرەسە، انالاردى بوساندىرعاندا ءوزىنىڭ مەيىرىمىن دارىتا ءبىلۋى قاجەت. بۇكىل قازاقستان بويىنشا زاماناۋي قۇرالدارمەن جابدىقتالعان كوپتەگەن مەديسينالىق ورتالىقتار سالىندى. دارىگەر – ەڭ ۇلى ماماندىق ەكەنىن ءاردايىم ەستە ساقتاڭىزدار. سىزدەرگە تابىس تىلەيمىن! – دەدى قازاقستان پرەزيدەنتى.

سونداي-اق، نۇرسۇلتان نازاربايەۆقا مەديسينا تەحنيكالارىن ءوندىرۋشى Siemens، Karl Storz، General Electric، Drager، Hamilton جانە باسقا دا جەتەكشى كومپانيالار ۇسىنعان قازىرگى زامانعى قۇرال-جابدىقتار كورسەتىلدى.   

«كەرۋەن-Medicus» جاڭا عيماراتى 2017 جىلى سالىندى. ونىڭ جالپى كولەمى – 10 مىڭ شارشى مەتر. كلينيكادا ناقتى ۋاقىت رەجىمىندە 3D-فورماتىنداعى كۇردەلى وپەراسيالار جاسالادى. مەديسينالىق ورتالىق كورەيانىڭ Severance Hospital، گەرمانيانىڭ Freiburg University Klinik، سەۋل ۇلتتىق ۋنيۆەرسيتەتىنىڭ بۋندان كلينيكالارىمەن، سونداي-اق ەۋروپانىڭ جەتەكشى كلينيكالارىنىڭ وكىلى – Puls Global كومپانياسىمەن كادر دايارلاۋ جونىندە ىنتىماقتاستىق ورناتقان.