جەڭىس كۇنى قارساڭىندا قالا تۇرعىندارى مەن قوناقتارىن مازمۇندى مەرەكەلىك باعدارلامالار كۇتۋدە.

7 مامىردا ساعات 10-00-دە رەسپۋبليكا سارايى الدىنداعى اباي الاڭىندا قازاقستان رەسپۋبليكاسىنىڭ قارۋلى كۇشتەرى قاتارىنا شاقىرىلعاندارعا قاتىستى سالتاناتتى شارا وتەدى. شارا بارىسىندا بارلاۋ بولىمشەسى دەسانت-شابۋىل اسكەرلەرىنىڭ كورسەتىلىمى مەن ق ر مەملەكەتتىك ۇرلمەلى اسپاپتار وركەسترىنىڭ مەرەكەلىك كونسەرتى بولادى.

وتان قورعاۋشى كۇنى مەرەكەسى اياسىندا ساحنادا وتاندىق ەسترادا جۇلدىزدارى، سونىڭ ىشىندە نۇرقات سۇيىنبەك، ەربولات قۇدايبەرگەنوۆ، Monique، ايجان نۇرماعامبەتوۆا جانە باسقالارى ونەر كورسەتەدى.

ساعات 11-00-دە مەگاپوليستىڭ بارلىق ۆيدەوبوردتارىندا «وتار» اسكەري بازاسىنداعى قازاقستان رەسپۋبليكاسى قارۋلى كۇشتەرىنىڭ جاۋىنگەرلىك شەرۋىنەن تىكەلەي ترانسلياسيا ۇيىمداستىرىلادى.

ءدال وسى كۇنى ساعات 22-00-دە سايران وزەنى جاعاسىندا مەرەكەلىك ساليۋت بولادى.

«ۇلى دالا ويىندارى» مەرەكەلىك فەستيۆالى اياسىندا مەگاپوليستە ءبىرقاتار سپورتتىق – بۇقارالىق شارالار جوسپارلانعان.

7 مامىردا ساعات 10-00-دە قالالىق يپپودرومدا ات سپورتىنىڭ ۇلتتىق تۇرلەرىنەن جارىستار وتەدى.

8 مامىردا ساعات 19-00-دە قازاقستاندا العاش رەت «سۇڭقار» سپورت كەشەنىندە «بەلدەسۋ» ۇلتتىق كۇرەسى بويىنشا «حالىق بارىسى» اشىق رەسپۋبليكالىق تۋرنير وتەدى. بۇل - يۋنەسكو-نىڭ قولداۋىمەن وليمپيادالىق ەمەس سپورتتىڭ الەمدىك جەلىسىنە ەنگەن ەڭ كونە ەجەلگى ۇلتتىق كۇرەس ءتۇرى. تۋرنيرگە ەلىمىزدىڭ ءار وڭىرىنەن مىڭعا جۋىق پالۋان قاتىسادى، ونىڭ جۇلدەلىك قورى 20 ميلليون تەڭگە.

9 مامىردا ساعات 11-00-دە 28ء-شى گۆاردياشىل-پانفيلوۆشىلار ساياباعىندا ۇلى وتان سوعىسىنداعى جەڭىس كۇنىننىڭ 73 جىلدىعىنا وراي «ماڭگىلىك الاۋعا» گۇل شوقتارىن قويۋ ءراسىمى وتەدى.

«بۇل كۇنى ءداستۇر بويىنشا اسكەري اسحانا ۇيىمداستىرىلىپ، مەرەكەلىك باعدارلاما ۇسىنىلادى. اسكەري تەحنيكا كورمەسى، ارنايى فوتوايماق، العىس قابىرعاسى، ءتىرى ينستاللياسيالار مەن تەاترلاندىرىلعان قويىلىمدار جوسپارلانعان. بۇلاردان وزگە، ارينە سوعىس جىلدارىنىڭ سۇيىكتى اندەرى ورىندالادى. كەز- كەلگەن جان وعان قاتىسىپ، جەڭىس ءۇشىن قۇربان بولعانداردى ەسكە الادى»، - دەپ اتاپ ءوتتى مادەنيەت باسقارماسىنىڭ باسشىسى حانزادا ەسەنوۆا.

ساعات 12-00-دە «استانا» الاڭىنان «قاھارمان ۇلت–بەسسمەرتنىي پولك» شەرۋى باستالادى. شەرۋ تولە بي كوشەسىنەن دوستىق داڭعىلىنا دەيىن، سودان سوڭ دوستىق داڭعىلىنان قازىبەك بي كوشەسىنە دەيىن بارىپ، زەنكوۆ كوشەسىنەن 28ء-شى گۆاردياشىل-پانفيلوۆشىلار ساياباعىنداعى داڭق مەموريالىنا بارادى.

ءدال وسى كۇنى ساعات 20-00-دە «استانا» الاڭىندا قازاق ەسترادا جۇلدىزدارىنىڭ قاتىسۋىمەن مەرەكەلىك كونسەرت ۇيىمداستىرىلادى. ەلىمىزدىڭ ەڭبەك سىڭىرگەن قايراتكەرى الەكساندر بەلياكوۆتىڭ باسشىلىعىمەن ەسترادالىق-سيمفونيالىق وركەستردىڭ ورىنداۋىندا سوعىس جىلدارىنىڭ تانىمال اندەرى شىرقالادى.

مەرەكەلىك شارا سوڭى ساعات 22-00-دە «استانا» الاڭىنداعى ساليۋتكە ۇلاسادى.