الماتى قالاسىنىڭ جولاۋشىلار كولىگى جانە اۆتوموبيل جولدارى باسقارماسىنىڭ جاڭا باسشىسى بولىپ تالعات حوسچانوۆ تاعايىندالدى. سوڭعى ەكى جىلدا ول وسى مەكەمە باسشىسىنىڭ ورىنباسارى بولعان.

باسقارمانىڭ جاڭا باسشىسى ءۇشىن قالا جولدارىن بارىنشا ساپالى ءارى دەر كەزىندە جوندەۋ كەزەك كۇتتىرمەيتىن مىندەت بولىپ تابىلادى. سوڭعى جىلدارى مەگاپوليستە 180 كم جول جانە 700 كم ينجەنەرلىك جەلى سالىندى جانە جوندەلدى. بيىلعى جىلى ۇزىندىعى 155 كم بولاتىن 157 كوشەنى جوندەۋ جوسپارلانعان، بىرنەشە جولايرىقتارى سالىنىپ، ماگيسترالدى كوشەلەر ۇڭگىلەنۋدە.

«قالا جۇرگىنشى ءۇشىن» قاعيداسى اياسىندا ۇزىندىعى 30 شاقىرىمنان اساتىن جاڭا تروتۋارلار سالىنۋدا جانە جوندەلۋدە. ءوز كەزەگىندە باۋىرجان بايبەك باسقارمانىڭ جاڭا باسشىسىنا بارلىق 157 كوشەنى جوندەۋ كەزىندە جۇرگىنشى جولدارىن تالاپقا ساي جاڭارتۋ قاجەتتىگىن تاپسىردى. بۇلاردان وزگە، جۇرگىنشى قوزعالىسىن قيىنداتاتىن تروتۋارلارداعى ءتۇرلى قۇرىلىستار زەرتتەلەدى.

الماتى اكىمى قالانىڭ كولىك جۇيەسىن ودان ءارى مودەرنيزاسيالاۋ بويىنشا ناقتىلى تاپسىرمالار بەردى. وتكەن جىلى قالانىڭ اۆتوبۋس پاركى 30%-عا جاڭاردى. جەكە تاسىمالداۋشىلار ەسەبىنەن بيىلعى جىلى تاعى 600 جاڭا اۆتوبۋس الۋ جوسپارلانعان، ول قالانىڭ اۆتوبۋس پاركىن 70%-عا دەيىن جاڭارتۋعا مۇمكىندىك بەرەدى.