الماتىداعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە قازاقستان حالقى اسسامبلەياسىنىڭ كافەدراسى اشىلدى.

قازاقستان حالقى اسسامبلەياسى كافەدرالار قاۋىمداستىعىنىڭ پرەزيدەنتى اناتوليي باشماكوۆتىڭ ايتۋىنشا، بۇل جەر ەتنوساياساتقا قاتىستى عىلىمي الەۋمەتتىك زەرتتەۋلەر الاڭىنا اينالماق.

«بۇل جەردى ستۋدەنت جاستارمەن ۇزدىكسىز جۇمىس جاسايتىن اسسامبلەيانىڭ كىشى فيليالى دەسەك بولادى. ساراپتامالىق جۇمىستاردى جۇرگىزۋ  جانە ءبىلىم بەرۋ ماقساتىندا اشىلىپ وتىر. مەن اسسامبلەيانىڭ ءوزىن قازاقستاندا ءومىر ءسۇرىپ جاتقان ءتۇرلى ەتنوستىڭ پاتريوتتىق  تاربيەسىن جولعا قوياتىن مەكتەپ دەپ بىلەمىن»،- دەدى اناتوليي باشماكوۆ.

دوڭگەلەك ۇستەلدە ءسوز العان ۋنيۆەرسيتەت رەكتورى تاكير بالىقبايەۆ، بۇل قادامنىڭ قانشالىقتى  ماڭىزدى ەكەنىن اتاپ ءوتتى.

«ءبىزدىڭ وقۋ ورنىندا 35-تەن استام ەتنوس وكىلدەرى ءبىلىم الادى. شىعىس تىلدەرى كافەدراسى بار. 2011 جىلدان باستاپ ءتۇرلى ۇلت جاستارىنىڭ باسىن قوساتىن ستۋدەنتتەر اسسامبلەياسى جۇمىس ىستەپ كەلەدى. وعان قوسا ءبىز قازاقستاننىڭ بولشاق ۇستازدارىن دايىنداپ وتىرعان سوڭ، ولاردى تاربيەلەۋدەگى ينتەرناسيوناليزم رۋحى وتە قاجەت. بۇل قاسيەت وسى ماماندار ارقىلى كەلەشەكتە ەلىمىزدىڭ بارلىق ايماقتارىنا بەرىلەدى».

قازاقستان حالقى اسسامبلەياسى ءتوراعاسىنىڭ ورىنباسارى - حاتشىلىق مەڭگەرۋشىسى لەونيد پرولوكوپەنكونىڭ ايتۋىنشا، بۇگىندە قازاقستانداعى كافەدرا قاۋىمداستىعى قۇرامىندا 35 كافەدرا، 1 قوعامدىق كەڭەس، 1 ينستيتۋت، 3 ورتالىق، بەيبىتشىلىك پەن كەلىسىمدى  ناسيحاتتايتىن  42-گە جۋىق جوعارىى وقۋ ورنى بار.