الماتىدا سايىن كوشەسىندەگى تۇرعىن ءۇيدىڭ ءبىرىنشى قاباتىندا ورنالاسقان شاشتاراز ورتەندى. بۇل تۋرالى قالالىق تجد باسپا ءسوز قىزمەتىنەن مالىمدەدى.

ءورت شىققانى تۋرالى حابارلاما قالالىق ءتجد-نىڭ «101» پۋلتىنە  ساعات 21:24-تە كەلىپ تۇسكەن.

«اۋەزوۆ اۋدانىنا قاراستى سايىن كوشەسىندەگى 14/1 تۇرعىن ءۇيدىڭ كىرە بەرىسىن جالىن شارپىعان. ءورت ءسوندىرۋ قىزمەتى وقيعا ورنىنا 9 مينۋت وتكەن سوڭ، ياعني 21:33-تە جەتتى. ءمالىم بولعانداي، جالىن 4 قاباتتى تۇرعىن ءۇيدىڭ ءبىرىنشى قاباتىنداعى  «اراي» شاشتارازىنان شىققان. قويۋ ءتۇتىننىڭ كەسىرىنەن جوعارعى قابات تۇرعىندارى ەۆاكۋاسيا جولىن پايدالانا الماعان. 81 ادام قۇتقارىلدى. ونىڭ 16-سى - بالالار. جوعارعى قاباتتاعى تۇرعىنداردى مەحانيزاسيالاندىرىلعان اۆتوساتىلارمەن قۇتقارۋ شارالارى ۇيىمداستىرىلدى»، - دەدى الماتى قالاسى تجد باسپا ءسوز قىزمەتىنەن.

قالالىق تجد باسپا ءسوز قىزمەتىنىڭ مالىمدەۋىنشە، ءورت دەر كەزىندە ءسوندىرىلدى. ول 22:07-دە اۋىزدىقتالىپ، 22:27-دە تولىقتاي وشىرىلگەن.جوعارعى قاباتتاعى پاتەرلەر مەن جانىنداعى ۇيلەرگە ەش زيان كەلمەگەن. جالىن 25 شارشى مەتر اۋماقتى شارپىعان. ءورت كەزىندە 15 جاسار قىز بالا تۇتىنگە ۋلانىپ قالدى. ونى جەدەل جاردەم كولىگى جاقىن ماڭداعى اۋرۋحاناعا جەتكىزدى.