الماتىدا دارىگەرلەر تۋبەركۋلەزبەن اۋىراتىن ناۋقاستارعا قاجەتتى تەگىن دارى-دارمەكتىڭ تاۋسىلا باستاعانىن ايتىپ، دابىل قاعۋدا.

بۇل ماسەلەنى الماتىدا وتكەن قوعامدىق كەڭەس وتىرىسىندا قالالىق دەنساۋلىق ساقتاۋ باسقارماسىنىڭ باسشىسى سەرىكبول مۋسينوۆ كوتەرگەن بولاتىن.

ونىڭ ايتۋىنشا، تەگىن دارى-دارمەك تاپشىلىعى ماسەلەسى بىلتىر كۇزدەن باستالعان.

«2017 جىلى دارى-دارمەكپەن امبۋلاتوريالىق قامتۋعا رەسپۋبليكا بيۋدجەتىنەن 16،5 ملرد تەڭگە بولىنگەن بولاتىن. الايدا، بۇل قاراجات جەتپەدى. سونىڭ كەسىرىنەن تاپشىلىق تۋدى. بيىل ق ر دسم 2 ايعا قاجەتتى 1،1 ملرد تەڭگەنىڭ ورنىنا 894 ملن تەڭگە عانا بولگەن بولاتىن. وسىلايشا، جازىلعان رەسەپتتەردىڭ 70 پايىزى عانا قامتاماسىز ەتىلدى. قالعانىنا ءدارى جەتپەدى»، - دەدى سەرىكبول مۋسينوۆ.

بيىل الماتى قالاسى 29 ملرد تەڭگەگە ءوتىنىم بەرگەن. الايدا، رەسپۋبليكالىق بيۋدجەتتەن 15،9 ملرد تەڭگەنى قىسقارتىپ تاستادى.

قالا اكىمدىگى 9،1 ملرد تەڭگە كولەمىندە قوسىمشا قاراجات ءبولىندى.

باسقارما باسشىسى تۋبەركۋلەزبەن اۋىراتىن ناۋقاستاردى دارى-دارمەكپەن قامتۋ ماسەلەسى دە ۋشىعىپ تۇرعانىن ايتتى. «تۋبەركۋلەزبەن اۋىراتىندارعا دارى-دارمەك الىنعان جوق. ماۋسىم ايىندا ولاردىڭ قورى تاۋسىلادى. ءبىراق، ونداي ولقىلىقتى بولدىرماس ءۇشىن ارەكەت ەتىپ جاتىرمىز. جالپى العاندا 433 اتاۋدىڭ 5ء-ى  بويىنشا دارى-دارمەك تاپشىلىعى بايقالادى»، - دەدى س.مۋسينوۆ. 

ايتا كەتۋ كەرەك، بىلتىر قازاقستاندا ينسۋلينگە تاۋەلدى ديابەت ناۋقاستارىن دارىمەن قامتۋ پروسەسى ءۇزىلىپ قالىپ، حالىقتىڭ نارازىلىعىن تۋدىرعان بولاتىن.