الماتى قالاسى سسكا وقۋ-دايىندىق ورتالىعىنىڭ بازاسىندا حالىق قاھارمانى، تاۋەلسىز قازاقستاننىڭ قورعانىس ءمينيسترى، ارميا گەنەرالى ساعادات قوجاحمەت ۇلى نۇرماعامبەتوۆتى ەسكە الۋعا ارنالعان بوكستان جيىرما ەكىنشى حالىقارالىق تۋرنير اياقتالدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

جارىس ءداستۇرلى تۇردە وتكىزىلىپ وتىرادى جانە حالىقارالىق دەڭگەيگە يە بولعان. قازاقستان، قىرعىزستان، موڭعوليا، رەسەي، تاجىكستان جانە وزبەكستاننان كەلگەن 150 بوكسشى بىرنەشە كۇننەن بەرى ءوزارا ەڭ ۇزدىكتەردى انىقتادى.

"مۇنداي ءتۋرنيردى وتكىزۋ - بوكس الەمىندەگى ماڭىزدى وقيعا بولىپ تابىلادى. ارميا گەنەرالى ساعادات نۇرماعابەتوۆ اتىنداعى تۋرنير - وتاندىق بوكسشىلار اراسىندا ۇلكەن مارتەبەگە يە ءىرى جارىس"، - دەدى وليمپيادا ويىندارىنىڭ قاتىسۋشىسى، اسكەري قىزمەتشىلەر اراسىنداعى الەم چەمپيونى، ەڭبەك سىڭىرگەن سپورت شەبەرى، الماتى قالالىق بوكس فەدەراسياسىنىڭ ۆيسە-پرەزيدەنتى ميحايل يۋرچەنكو.

تۋرنير ناتيجەسى بويىنشا، ەڭ ۇزدىك بوكسشى اتاعىنا سسكا شتاتتىق كومانداسىنىڭ سپورتشىسى ساپارباي ايداروۆ يە بولسا، ەرلان عازيزوۆ ەڭ ۇزدىك تورەشى اتاندى. ال "جەڭىسكە ۇمتىلىس" نوميناسياسىن قىرعىستاننان كەلگەن سپورتشى اسىلبەك امانقۇل ۇلى جەڭىپ الدى.

سالماق كاتەگوريالارى اراسىندا تۋرنير جەڭىمپازدارى مىناداي: بەرىكبايەۆ ماردان (سسكا، 49 كەلى)، مۋزاپاروۆ انۆار (سسكا، 52 كەلى)، كۋچكاروۆ ابدۋللو (وزبەكستان، 56 كەلى)، سيحىمبايەۆ ايدىن (وقو، 60 كەلى)، ەردەنەبات سەندبااتار (موڭعوليا، 64 كەلى)، ءومىرتاي نۇرحات (قاراعاندى وبلىسى، 69 كگ)، ايداروۆ ساپارباي (سسكا، 75 كەلى)، سابيروۆ نۇرلان (ماڭعىستاۋ وبلىسى، 81 كەلى)، ساندراحمانوۆ ماديار (وزبەكستان، 91 كەلى) جانە فومينىح دميتريي (رەسەي فەدەراسياسى، 91 كەلىدەن جوعارى).

"مەن بارىنە ريزامىن، مىقتى دايىندىقپەن كەلىپ، جەڭىسكە ۇمتىلدىم. قارسىلاستارىم - وتە كۇشتى، جەكپە-جەك وڭاي بولمادى. كوماندامىزدى جەڭىسىمەن قۇتتىقتايمىن! جاتتىقتىرۋشىلارىمىزعا، كومانداعا جانە ءبىزدى قولداعان جانكۇيەرلەرىمىزگە ۇلكەن راحمەت!"، - دەپ العىسىن ءبىلدىردى 75 كەلى سالماق كاتەگورياسىنداعى جارىستاردىڭ جەڭىمپازى، ارميانىڭ ورتالىق سپورت كلۋبىنىڭ سپورتشىسى ايداروۆ ساپارباي.

جەڭىمپازدار جارىس ناتيجەلەرى بويىنشا، وسى جىلدىڭ مامىر ايىندا استانا قالاسىندا وتەتىن ق ر پرەزيدەنتىنىڭ كۋبوگىنە ارنالعان تۋرنيرگە جانە 18 تامىز بەن 2 قىركۇيەك ارالىعىندا يندونەزيادا وتەتىن ازيا چەمپيوناتىنا قاتىسۋعا ۇمىتكەر رەتىندە قارالاتىنىن ايتا كەتۋ كەرەك.