الماتىدا وتكەن قازاقستاننىڭ ەڭ ءىرى مەديسينالىق كورمەسى - KIHE 2018 اياسىندا 300-گە جۋىق سوڭعى ۇلگىدەگى تەحنيكالار تانىستىرىلدى.
الماتىدا مەديسينا جانە فارماسيەۆتيكا يندۋسترياسى ماماندارىنىڭ قاتىسۋىمەن وتەتىن ءداستۇرلى كورمە 2 كۇنگە سوزىلادى. مۇندا زاماناۋي مۇمكىندىكتەرگە يە دياگنوستيكالىق جانە ەمدەۋ تەحنولوگيالارى تانىستىرىلادى.
كورمەگە ەلەكتروندى مەديسينالىق جابدىقتار مەن مەديسينالىق تەحنولوگيالار، زەرتحانالىق قۇرالدار، وپتيكا جانە وفتالمولوگيا، قۇتقارۋ جابدىقتارى مەن جەدەل-جاردەم قۇرالدارى، ورتوپەديا جانە وڭالتۋ، اۋرۋحانالار مەن ساناتورييلەرگە، فارماكولوگياعا ارنالعان 300-گە جۋىق جابدىقتار قويىلعان.
سونداي-اق، كت مەن مرت اپپاراتانى اۋىستىرا الاتىن زاماناۋي ۋدز جابدىعى تانىستىرىلدى.
ادامنىڭ بۇكىل اعزاسىن - كوز، مي، تامىر ىشكى ورگانداردىڭ بارلىعىن زەرتتەۋگە مۇمكىندىك بەرەدى.
كوپشىلىكتىڭ نازارىن كورەيادا جاسالعان لور كومباينى اۋداردى. بۇل لور دارىگەرىنىڭ جۇمىسىن جەڭىلدەتەتىن بىردەن-بىر اپپارات. قۇلاق ، مۇرىن، تاماق اۋرۋلارىنىڭ دياگنوستيكاسىن جاساۋدا ءارى ەمدەۋدە وتە قاجەتتى اپارات.
لور كومبايننىڭ كومەگىمەن فيزيوتەراپيەۆتيكالىق مودۋلمەن ەمدەۋ جۇمىستارىن جۇرگىزۋگە بولادى. مۇنىڭ كومەگىمەن مۇرىن قۋىسى، قۇلاق جولدارىن تازالاۋعا بولادى.
وتاندىق ءونىم بولىپ سانالاتىن توسەك تراۆموتولوگيالىق جاراقاتتاردى ەمدەۋگە ارنالعان. بۇل توسەكتىڭ ناۋقاس ءۇشىن تيىمدىلىگى سول، ونىڭ وتىرۋىنا جاعداي جاساي الاتىن ارقا بولىگى مەن تىزەسىن بۇگۋگە قولايلى تومەنگى تۇسى يىلگىش كەلەدى.
شالا تۋىلعان نارەستەلەرگە ارنالعان ينكۋباتور ءسابيدى ءوز اناسىنىڭ قۇرساعىنداعىداي اتموسفەراعا بولەي الادى. ەلىمىزدىڭ كوپتەگەن پەريناتولوگيالىق ورتالىقتارىندا كەزدەسەتىن بۇل اپپارات كوپشىلىك تاراپىنان ماقتاۋعا يە بولعان.
ايتا كەتەيىك، كورمەگە الەمنىڭ 17 ەلىنەن 170 كومپانيا قاتىستى. ولار ۇلىبريتانيا، گەرمانيا، ءۇندىستان، يوردانيا، قازاقستان، جۇڭگو، كورەيا، لاتۆيا، پولشا، رەسەي، تايلاند، تۇركيا، وزبەكستان، ۋكراينا، فرانسيا جانە چەحيا ەلدەرىنىڭ تانىمال وندىرۋشىلەرى بولىپ تابىلادى.
