ءال-فارابي اتىنداعى قازۇۋ  شىعىستانۋ فاكۋلتەتىندە ازەربايجان دەموكراتيالىق رەسپۋبليكاسىنىڭ 100 جىلدىعى قارساڭىندا ازەربايجان تاريحى مەن مادەنيەتى ورتالىعى اشىلدى.

ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ تاريح جانە مادەنيەت ورتالىعىنىڭ اشىلۋىنا اتسالىسقان تۇلعالارعا العىس ايتتى.

«بۇل ورتالىق باۋىرلاس ەلدەر اراسىندا ءبىلىم مەن عىلىم سالاسىنداعى قارىم-قاتىناستى نىعايتۋعا، ەكى ەلدىڭ جوعارعى وقۋ ورىندارىنىڭ بايلانىسىن بەكىتە تۇسۋگە سەپ بولادى.  سونداي-اق، بۇل جەردەن سىزدەر ءبىزدىڭ ەلىمىز تۋرالى اۋقىمدى اقپاراتتى تىكەلەي تابا الاسىزدار. ازەربايجان ەلىنە قاتىستى زەرتتەۋ جۇمىستارىڭىزدىڭ قاينار كوزى بولماق»، - دەدى راشاد ماممادوۆ.

حالىقارالىق تۇركسوي ۇيىمىمەن بىرلەسىپ ۇيىمداستىرىلعان مادەنيە شارا اياسىندا  تۇركى حالىقتارىنىڭ قوس تۇلعاسى، ازەربايجاننىڭ ۇلى اقىنى حۋسەين ءدجاۆيدتىڭ 135 جىلدىعى، ازەربايجان حالقىنىڭ كوشباسشىسى گەيدار الييەۆتىڭ 95 جىلدىعىنا قاتىستى كونفەرەنسيا ءوتتى.

حالىقارالىق تۇركى اكادەمياسىنىڭ پرەزيدەنتى  دارحان ءقىدىرالى تۇركى الەمىنىڭ ماقتان تۇتاتىن ازاماتتارىن ۇلىقتاۋ شاراسى استانادان باستاۋ العانىن تىلگە تيەك ەتتى.

«ازاتتىقتىڭ جارشىسى رەتىندە بۇكىل الەمگە ازەربايجان ادەبيەتىن تانىتقان حۋسەين ءدجاۆيدتىڭ 135 جىلدىق مەرەيتويى استانادان،  الماتىدان، قازۇۋ-دەن باستالىپ جاتقانى ءبىز ءۇشىن ۇلكەن قۋانىش.  حۋسەين دجاۆيد  ماعجان (جۇمابايەۆ .رەد) سياقتى ۇلى اقىن بولعان. ال تۋرا سول ازەربايجان حالىق رەسپۋبليكاسى قۇلاپ جاتقان كەزدە،  ازەربايجان سوسياليستىك رەسپۋبليكاسى قۇرىلعان تۇستا دۇنيەگە كەلگەن بۇكىلحالىقتىق  ليدەر  گايدار الييەۆ تە تۇركى الەمىنىڭ  ماقتان تۇتار تۇلعالارىنىڭ ءبىرى»، - دەدى دارحان ءقىدىرالى.