ق ر ءبىلىم جانە عىلىم ۆيسە-مينيسترى بيبىگۇل اسانوۆا وقۋلىق جەتىسپەۋشىلىگى ماسەلەسىنە قاتىستى پىكىر ءبىلدىردى.

«وقۋلىقتار ماسەلەسىنە كەلسەك، بۇعان باعىتتالعان شىعىنداردى جەرگىلىكتى ورگان قارجىلاندىرادى. جان باسىنا شاققانداعى قارجىلاندىرۋعا  وقۋلىقتار كىرمەيدى. نەگىزىنەن وقۋلىق تاپشىلىعى تەك قىركۇيەك-قازان ايلارىندا عانا سەزىلەدى. بۇل ماسەلە اكىمدىكتەردىڭ قاراۋىندا»،- دەدى ۆيسە-مينيستر بيبىگۇل اسىلوۆا الماتىدا وتكەن جيىن بارىسىندا.

ول جاقىن ارادا ءبىلىم سالاسىن سيفرلاندىرۋعا بايلانىستى  وقۋلىق تاپشىلىعى ماسەلەسى  دە وزەكتىلىگىن جوياتىنىنا سەنىمدى.

«جاڭا مازمۇن بويىنشا شىققان وقۋلىقتاردىڭ ەلەكتروندى نۇسقاسىن ق ر بعم «وقۋلىق» ورتالىعىنان الۋعا بولادى. 2، 5، 7 سىنىپ وقۋلىقتارى سايتتا تۇر. 2018-2019 وقۋ جىلدارى 3، 6، 8 جانە 10 سىنىپتارعا ارنالعان،  2019-2020 وقۋ جىلدارىنىڭ - 4، 9، 11 سىنىپ وقۋلىقتارى جاريالاناتىن بولادى»،- دەدى ۆيسە-مينيستر.

رەسپۋبليكالىق جەكەمەنشىك ءبىلىم بەرۋ ۇيىمدارى قاۋىمداستىعىنىڭ جەتەكشىسى روزا سادىقوۆا جەكەمەنشىك مەكتەپ مۇعالىمدەرىنىڭ بىلىمدەرىن جەتىلدىرۋگە مۇمكىندىكتەردىڭ بولماي جاتاتىندىعى تۋرالى ايتتى.

«قازاقستاندا مۇعالىمدەردىڭ بىلىكتىلىگىن تەك قانا ورلەۋ ينستيتۋتى وتكىزەدى. ءبىزدىڭ مۇعالىمدەردىڭ ورلەۋدەن سەرتيفيكاتى بولماعاندىقتان، اتتەستاسيا كەزىندە كوپ قيىندىقتار تۋىندايدى»، - دەدى روزا سادىقوۆا.

ۆيسە-مينيستر جەكەمەنشىك ءبىلىم بەرۋ ۇيىمدارىنىڭ ماسەلەسى جاقىن ارادا وڭ شەشىمىن تاباتىنىن ايتتى.

ونىڭ سوزىنە قاراعاندا، ۇكىمەت  جان باسىنا شاققانداعى قارجىلاندىرۋ جۇيەسىن ەنگىزۋ ارقىلى جەكەمەنشىك مەكتەپتەردىڭ قۇرىلىسىن ىنتالاندىرۋعا نيەتتى.

ەسكە سالا كەتەيىك، بۇگىنگى وتىرىس بارىسىندا جەكەمەنشىك جانە مەملەكەتتىك مەكتەپتەردەگى جان باسىنا شاققانداعى قارجىلاندىرۋ ماسەلەسى قوزعالدى.