بيىل الماتىدا وتەتىن «بالا داۋىسى» ءان بايقاۋىنا 4 مىڭعا جۋىق بالا قاتىسادى. ناۋرىزدىڭ 15ء-ى مەن ءساۋىر ايىنىڭ 15ء-ى ارالىعىندا وتەتىن دوداعا 8 جاستان 12 جاسقا دەيىنگى بالالاردان 3 765 ءونلاين-وتىنىم كەلىپ تۇسكەن، دەپ حابارلايدى قازاقپارات ءتىلشىسى.

ۇيىمداستىرۋشىلاردىڭ ايتۋىنشا، بۇل بايقاۋ تاريحىنداعى رەكوردتىق كورسەتكىش بولىپ وتىر.

«الدىن-الا ىرىكتەۋ ناتيجەسى بويىنشا جاندى داۋىستا تىڭداۋدان ءوتۋ ءۇشىن 14 وبلىستان 80 بالا الماتى جانە استانا قالالارىنا شاقىرتۋ الدى. ىرىكتەۋ كەزەڭىندە كاسىبي تورەشىلەر مايرا مۇحامەد قىزى، جەڭىس سەيدوللا ۇلى، ماقپال يسابەكوۆا جانە اسەت ارىستانبەك تورەلىك ەتەدى. ەكى كۇن ىشىندە بالالار وزدەرىنىڭ جانكۇيەرلەرىن تەك قانا ۆوكالدىق قانا ەمەس، بيشىلىك جانە ارتىستىك قابىلەتتەرىمەن تاڭ قالدىرادى. تورەشىلەر 80 بالانىڭ ىشىنەن ءار وبلىستان 1 جانە الماتى، استانا قالالارىنان 2 قاتىسۋشىدان ىرىكتەپ الادى. ولار قىركۇيەك ايىندا تەليەۆيزيالىق سۋپەر-فينالعا دايىندىق وتەتىن «بالا داۋىسى» جۇلدىزدى ۇيىنە بارۋعا مۇمكىندىك الادى. جاس ونەرپازدار مۇندا ۆوكال، اكتەرلىك شەبەرلىك، حورەوگرافيا، ءسان ونەرى جانە ساحنا ءتىلى ساباقتارىن وقيدى»، - دەدى ۇيىمداستىرۋشىلار.

24-قىركۇيەكتەن باستاپ جاس انشىلەردىڭ ونەرىن تەلەكورەرمەندەر باعالايتىن بولادى.

1 ايدان اسا ۋاقىت ارالىعىندا تەلەكورەرمەندەر «حالىق سۇيىكتىسى» اتتى ارنايى سىيدىڭ يەگەرىن انىقتايدى. ال 8-جەلتوقساندا تىكەلەي ەفيردە قازىلار القاسى «بالا داۋىسى» III ماۋسىمىنىڭ جەڭىمپازىن اتايدى. جەڭىمپاز ۇلتتىق ونەر اكادەمياسىنىڭ وقۋ گرانتىن جەڭىپ الادى جانە ديسنەيلەندكە جولداما الادى.

ءار فيناليست بايقاۋ قورىتىندىسىنا قاراماستان ارنايى جاسالعان سيقىرلى نوتا جانە ۇيىمداستىرۋشىلاردىڭ ارنايى سىيلىقتارىنا يە بولادى.