الماتىدا 7 مامىر - وتان قورعاۋشىلار كۇنىنە وراي 50 جاس سارباز قارۋلى كۇشتەر قاتارىنا قابىلداندى.

سالتاناتتى شارا ق ر قارۋلى كۇشتەرىنىڭ قۇرىلعانىنا 26 جىل تولۋىنا وراي ۇيىمداستىرىلدى.

سارباز كۇنىندە جەرگىلىكتى اتقارۋشى ورگاندار جىلدا پاتريوتتىق شارالار وتكىزىپ، اسكەري بولىمدەرگە ەكسكۋرسيا جۇرگىزەدى.

سونىمەن قاتار، جاس ساربازدار ارداگەرلەرمەن كەزدەسىپ، اسكەري تەحنيكا كورمەسىنە قاتىسادى.

بۇگىنگى سالتاناتتى شارا ق ر كوك بايراعىنىڭ كوتەرىلۋىمەن باستالدى.

ب.مومىش ۇلى اتىنداعى رەسپۋبليكالىق اسكەري مەكتەبىنىڭ كۋرسانتتارى الماتى گارنيزونى وركەسترىنىڭ مۋزىكالىق سۇيەمەلدەۋىمەن كوك تۋدى كوتەرىپ شىقتى. 

"سىزدەر اتا-انالارىڭىز، ەلىڭىز ماقتاناتىنداي قىزمەت ەتۋلەرىڭىز كەرەك. وتان الدىنداعى بورىشىڭىزدى ادال اتقارىڭىزدار. ەل تىنىشتىعى مەن بەيبىتشىلىگىن ابىرويمەن قورعاڭىزدار"،- دەدى الماتى قالالىق قورعانىس ىستەرى بويىنشا دەپارتامەنتىنىڭ باسشىسىنىڭ ورىنباسارى فارحاد كۇرمانعاجينوۆ.

اسكەري قىزمەتشىلەر ەرەجەسىز جەكپە جەك بويىنشا ماشىقتارى مەن ۇرىس تەحنيكاسىن كورسەتتى.

جينالعاندار ن.نازاربايەۆتىڭ قاتىسۋىمەن وتكەن جاۋىنگەرلىك پارادتى ونلاين رەجىمدە كوردى.