فرانسيا پرەزيدەنتى ەممانۋەل ماكرون مەن رەسەي پرەزيدەنتى ۆلاديمير پۋتين پەتەربۋرگ حالىقارالىق ەكونوميكالىق فورۋمى اياسىندا كەلىسسوزدەر جۇرگىزدى. كەزدەسۋ بارىسىندا باسشىلار كيبەرقىلمىسپەن كۇرەس جانە ۋكراينانىڭ وڭتۇستىك شىعىسىنداعى جانجالدى رەتتەۋ جونىندەگى مينسك كەلىسىمىن تالقىلادى.

بۇعان قوسا رەسەيدە تۇرمەدە وتىرعان ۋكراينالىق رەجيسسەر ولەگ سەنسوۆ پەن ءۇي قاماقتا وتىرعان رەسەيلىك رەجيسسەر كيريلل سەرەبرياننيكوۆتىڭ ءىسى ءسوز بولدى.

«كەلىسسوزدەر بارىسىندا ءبىز ادام قۇقىقتارى جونىندە ءسوز قوزعاپ، وزەكتى ماسەلەلەردى ءتالقىلادىو. سەنسوۆ مىرزا دا بار... پرەزيدەنتكە بۇل ەكى ماسەلەنىڭ ءبىزدىڭ ەل ءۇشىن ماڭىزدى ەكەنىن جەتكىزدىم. مەن بۇل مەملەكەتتىڭ ادىلەت جۇيەسىنە جاۋاپ بەرە المايمىن، ءبىراق اشىق جانە شىنايى ديالوگ وتكىزۋگە مۇمكىندىك  مول»، - دەدى ماكرون كەزدەسۋ اياقتالعان سوڭ.

ولەگ سەنسوۆ جايلى سۇراق قويعان فرانسۋز جۋرناليسىنە پۋتين جاۋاپ بەردى. پرەزيدەنتتىڭ ايتۋىنشا، ۋكراينالىق رەجيسسەر سەنسوۆ «تەراكت ارەكەتتەرىن ۇيىمداستىرماق» بولعانى ءۇشىن رەسەيدە 20 جىلعا قامالعان.

3 ساعاتقا جۋىق سوزىلعان كەزدەسۋ بارىسىندا اقش-تىڭ يران يادرولىق كەلىسىمىنەن شىعۋى ءسوز بولدى. ماكرون تەگەراننىڭ ءوز مىندەتتەرىن كەلىسىم اياسىندا ورىنداۋى ءۇشىن جاعداي جاساۋ كەرەك ەكەنىن ەسكەرتتى. فرانسۋز باسشىسىنىڭ سوزىنشە، اقش تاراپىنان تونگەن سانكسيالارعا قاراماستان ەۋروپا ەلدەرى يرانداعى كومپانيالارىنىڭ جۇمىسىن جالعاستىرۋ ءۇشىن ارەكەتتەنۋلەرى كەرەك. كەلىسسوزدەگى وزەكتى تاقىرىپتاردىڭ ءبىرى – سيريا. ماكرون سيرياداعى قاقتىعىستى شەشۋدە وڭىرلىك دەرجاۆالاردىڭ ءبارى اتسالىسۋ كەرەك ەكەنىن ايتتى.

كەلىسسوزدەر سوڭىندا مەملەكەتتەر اراسىندا ىنتىماقتاستىق، سەرىكتەستىك قۇجاتتارىنا قول قويىلدى.