Almaty Arena سپورت كەشەنىندە برازيليالىق دجيۋ-دجيتسۋدان Arlan Grip Selection «Koktem open-2018» xالىقارالىق ءتۋرنيرى باستالدى، دەپ حابارلايدى قالالىق اقپاراتتىق جانە سپورتتىق حاب.

بۇگىن، جارىستىڭ ءبىرىنشى كۇنى 6-17 جاس ارالىعىنداعى بالالار مەن جاسوسپىرىمدەر كۇش سىناستى. 400-گە جۋىق سپورتشى تەك الماتى قالاسى ەمەس، ەلىمىزدىڭ ءار وبلىسىنان جانە قىرعىستاننان كەلىپ ونەر كورسەتتى.

وسى ارەناعا جينالعان قوناقتار مەن اتا-انالار قىزىقتى ءارى تارتىستى كەزدەسۋلەردىڭ كۋاسى بولىپ، ولارعا قولداۋ كورسەتتى. ناتيجەسىندە جەڭىمپازدار مەن جۇلدەگەرلەر مەدال جانە ديپلوممەن ماراپاتتالدى.

«جارىس جاقسى دەڭگەيدە ءوتتى. وكىنىشكە قاراي، ءبىرىنشى ورىن الا المادىم. قارسىلاسىم مىقتى بولدى. ونىڭ ۇستىنە سوڭعى جاتتىعۋلارعا كوپتەگەن سەبەپتەرمەن كەلە المادىم، سول ناتيجەگە ءوز اسەرىن تيگىزدى. ءبىراق، الدا جەڭىستى كۇندەر كوپ بولادى دەپ سەنەمىن»، - دەدى قولا جۇلدەگەر ارنۋر شابدار.

ايتا كەتۋ كەرەك، بۇل جارىس IBJJF ەرەجەلەرىنە سايكەس ءتۇرلى سالماق دارەجەلەرى بويىنشا ۇيىمداستىرىلدى.

ەرتەڭ، ەكىنشى كۇنى جارىس 18 جاستان جوعارى قاتىسۋشىلار اراسىندا وتكىزىلەدى. باستالۋى ساعات 10:30-دا.

ءتۋرنيردىڭ باستى ماقساتى ەلىمىزدە برازيليالىق دجيۋ-دجيتسۋدى دامىتىپ، ەلگە تانىتۋ، سپورت پەن سالاۋاتتى ءومىر سالتىن ناسيحاتتاۋ، سپورتشىلاردىڭ شەبەرلىكتەرىن ارتتىرۋ جانە ۇزدىكتەردى انىقتاۋ بولىپ تابىلادى. جارىستىڭ ناتيجەلەرىن www.arlangrip.kz سايتىنان كورە الاسىزدار.