بۇگىن شاحمات اكادەمياسىندا وتكەن باسپا ءسوز ءماسليحاتى بارىسىندا جاس شاحماتشى جانسايا ابدىمالىك ەرلەر اراسىنداعى گروسسمەيستەر نورماسىن قاشان ورىندايتىنىن ايتتى.

الماتىلىق جانسايا ابدىمالىك بىلتىر قاراشادا 20 جاسقا دەيىنگىلەر اراسىندا الەم چەمپيونى اتاندى. بۇگىندە ول 3 نورمانى ورىندادى.

2011 جىلى - ايەلدەر اراسىنداعى حالىقارالىق شەبەر  اتاعىن، 2014 جىلى - ايەلدەر اراسىنداعى گروسسمەيستەر، 2017 جىلى - ايەلدەر اراسىنداعى حالىقارالىق شەبەر اتاعىن جەڭىپ الدى.

بۇگىندە 18-گە ەندى كەلگەن شاحماتشى بويجەتكەن ەرلەر اراسىنداعى گروسسمەيستەر نورماسىن ورىنداۋعا نيەتتەنىپ وتىر.

«رەيتينگتە 2 500 پۋنكتىنە جەتۋىم كەرەك. ءقازىر مەنىڭ رەيتينگىم 2 484 بولىپ تۇر. 16 پۋنكتتەن وتسەم بولدى، رەسمي تۇردە اتاق ۇسىنىلاتىن بولادى. جاقىندا يسپانياعا ۇشاتىن بولامىن. تۋرنيردە الەمدەگى ەڭ كۇشتى سپورتشىلارمەن ب ا ق سىناسامىن. قالعان پۋنكتتەردى سول جاقتا جيناپ كەلۋ ويىمدا بار»، - دەدى ج.ابدىمالىك.

الەمدە بۇل ناتيجەگە 18 نەمەسە ودان جاس كەزىندە 4 سپورتشى قىز جەتكەن. قىتايلىق حو فان، ءۇندىستاندىق حامپي كونەرۋ 15 جاستارىندا نورمانى ورىنداعان. ال، ماجار قىزى يۋديت پولگار - 16 جاسىندا، رەسەيلىك ەكاتەرينا لاگنو 18 جاستارىندا جەتتى.

جولى بولسا جانسايا ابدىمالىك جاس كەزىندە ەرلەر گروسسمەيستەرىن ورىنداعان الەمدەگى بەسىنشى ارۋ بولماق.

ايتا كەتۋ كەرەك، كوبىنە الەم چەمپيونى اتاعىن العان قىزدار بۇل اتاققا 20-25 جاستارىندا قول جەتكىزگەن.

«بيىل قىركۇيەككتە فيدە اسسامبلەياسىنىڭ وتىرىسىنا دەيىن قازاقتىڭ قىزى جانسايا ابدىمالىك ورتالىق ازياداعى ەرلەر اراسىنداعى گروسسمەيستەر اتاعىن جەڭىپ العان تۇڭعىش قىز بولارىنا سەنىمدىمىن»، - دەدى قازاقستان شاحمەت فەدەراسياسىنىڭ اتقارۋشى ديرەكتورى يرينا گريششەنكو.

بۇگىندە جانسايا ۋاقىتىن سپورتپەن اينالىسۋعا كوبىرەك ارناپ ءجۇر.

«تاڭەرتەڭ باسسەينگە بارامىن. شاحماتشىلار ءۇشىن فيزيكالىق دايىندىق وتە ماڭىزدى. سەبەبى، تاپجىلماي 2-2،5 ساعات وتىرۋ ءۇشىن ۇلكەن ءتوزىم كەرەك. سودان سوڭ اكادەمياداعى باپكەرلەرىممەن جاتتىعۋ پارتيالارىن جاسايمىن. تۇسكى استان سوڭ ۋكراينالىق باپكەرىممەن سكايپ ارقىلى جاتتىعامىن. باسقا نارسەلەرگە ۋاقىتىم مۇلدە جوق»،- دەدى جانسايا ابدىمالىك.