الماتى قالالىق توتەنشە جاعدايلار دەپارتامەنتى قالاداعى سەل ءجۇرۋ ءقاۋپىن يننوۆاسيالىق تەحنولوگيالار ارقىلى باقىلايتىن بولدى. بۇل تۋرالى بۇگىن وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتى بارىسىندا دەپارتامەنت باسشىسىنىڭ ورىنباسارى ەرلان الىبەكوۆ ايتتى.

«ءقازىر تاۋ كولدەرىندە، وزەن اڭعارلارىندا سەل ءجۇرۋ ءقاۋپىن باقىلايتىن  گيدروبەكەتتەر ورناتىلادى. بۇل ادىستەر بۇگىندە ەسكىردى. «سيفرلى قازاقستان» مەملەكەتتىك باعدارلاماسى اياسىندا سەل ءجۇرۋ ءقاۋپىن باقىلاۋدىڭ اۆتوماتتى جۇيەسىن ەنگىزىپ جاتىرمىز. جۇيە ارقىلى الماتىنىڭ تاۋلارىنداعى كولدەر مەن وزەندەردىڭ اڭعارىن ونلاين رەجىمدە باقىلاپ وتىرۋعا مۇمكىندىك تۋادى»، - دەدى قالالىق توتەنشە جاعدايلار دەپارتامەنتى باسشىسىنىڭ ورىنباسارى ەرلان الىبەكوۆ.

ونىڭ ايتۋىنشا، 2017 جىلى قالالىق تجد ۇلكەن الماتى مەن كىشى الماتى، قارعالى،  اقساي وزەندەرىنىڭ اڭعارىن باقىلاۋعا مۇمكىندىك بەرەتىن جۇيە جاساعان.

سيفرلىق باقىلاۋ جۇمىستارىن 2020 جىلعا دەيىنگى ۋاقىتتا اياقتاۋ جوسپاردا بار. وعان 56 ملن تەڭگە قارجى بولىنگەن.

سونىمەن قاتار، بيىل ءقاۋىپتى جاعدايدىڭ قالىپتاسۋ مۇمكىندىگىن زەرتتەۋگە قوسىمشا 27 ملن تەڭگە بولىنگەن. بۇل قارجىعا كىشى جانە ۇلكەن الماتىدا گەواقپاراتتىق جۇيەلەر ەنگىزىلەتىن سەل كارتاسى جاسالدى.

«ءدال ءقازىر مورەنا كولدەرى مۇز قۇرساۋىندا جاتىر. ماۋسىمدا بوگەندى بۇزىپ كەتۋى مۇمكىن دەگەن 7 كولدەن  سۋدى سورعىزۋ جۇمىستارى باستالادى»  - دەدى ە. الىبەكوۆ.