الماتىدا «باتىر» پرەزيدەنت پولكىنىڭ 0111 اسكەري بولىمىندە وتان قورعاۋشىلار كۇنىنە وراي سالتاناتتى جيىن ءوتتى.

اتالعان پولكتىڭ ءبىرقاتار جاۋىنگەرى وتان الدىندا قالتقىسىز قىزمەت ەتكەن ءۇشىن «ءمىنسىز قىزمەتى ءۇشىن» ءى-ىى-ىىى دارەجەلى مەدالىمەن ماراپاتتالدى.

سونىمەن قاتار، ساربازدارعا مەدەۋ اۋداندىق اكىمى مەن ق ر مەملەكەتتىك كۇزەت قىزمەتى باسشىسىنىڭ العىس حاتتارى تابىس ەتىلدى.

«بۇگىنگى تاۋەلسىز ەلىمىزدىڭ اسكەرى - ءبىزدىڭ اتا-بابالارىمىزدىڭ جاۋىنگەرلىك ءداستۇرىنىڭ زاڭدى جالعاسى. سوندىقتان دا، قالىپتاسقان يگى ءداستۇر بويىنشا جىل سايىن قازاقستان قارۋلى كۇشتەرىنىڭ قۇرىلعان كۇنى - وتان قورعاۋشىلار كۇنىن مەرەكەلەپ كەلەمىز. سوعان بايلانىستى، قارۋلى كۇشتەرىمىزدىڭ ابىرويىن اسقاقتاتار ساربازدارىمىزعا قانداي قۇرمەت كورسەتسەك تە، جاراسارى ءسوزسىز. اسپانىمىزدىڭ اشىق، ەل باقىتىنىڭ باياندى بولۋى - اسكەري جاۋىنگەرلەرىمىزدىڭ قولىندا ءارى كەلەر ۇرپاقتىڭ ەنشىسىندە»، - دەدى مەدەۋ اۋدانى اكىمىنىڭ ورىنباسارى مايلىبايەۆ عاني.

سالتاناتتى شارا وتاندىق ەسترادا جۇلدىزدارىنىڭ مەركەلىك كونسەرتىنە ۇلاستى.

ايتا كەتەيىك، قازاقستان رەسپۋبليكاسى مەملەكەتتىك كۇزەت قىزمەتىنىڭ «ايبىن» جانە «باتىر» پرەزيدەنتتىك پولكتەرى قازاقستاندىق ارميانىڭ ەليتاسى بولىپ ەسەپتەلەدى. ەڭ ۇزدىك اسكەري قىزمەتشىلەردى ءبىر ارناعا توعىستىرعان  قىزمەتتىڭ بۇل قۇرىلىمدىق بولىنىستەرىنە ىرىكتەۋ ءارى قاتاڭ تالاپتارعا ساي جۇرگىزىلەدى.

2012 جىلعى 16 اقپانداعى «اسكەري قىزمەت جانە اسكەري قىزمەتشىلەردىڭ مارتەبەسى تۋرالى»  زاڭىنا سايكەس جىلىنا ەكى رەت رەسپۋبليكا بويىنشا بوزبالالاردى اسكەرگە شاقىرتۋ جۇمىستارى باستالادى.

قىزمەتتىڭ وفيسەرلەرىمەن تىلدەسىپ، قازاقستان رەسپۋبليكاسى مەملەكەتتىك كۇزەت قىزمەتى تۋرالى تولىققاندى اقپارات العاننان كەيىن، اسكەرگە شاقىرىلۋشىلاردىڭ كوپشىلىگى ءدال وسى ەليتالى قۇرىلىمدارعا، ياعني «ايبىن» جانە «باتىر» پرەزيدەنتتىك پولكتەرىنە شاقىرىلۋدى قالايتىندىقتارىن جاسىرمايدى. ىرىكتەۋ بارىسىندا بەكىتىلگەن ەرەجە-تالاپتارعا سايكەس ەڭ باستىسى وتانعا دەگەن شەكسىز ادالدىعىمەن، شىنشىلدىعىمەن، وقىس جاعدايلاردا جالعىز ءارى ناقتى شەشىم قابىلداي ءبىلۋ قابىلەتىمەن، ءتوزىمدى ءارى دەنەسى شىمىر كەلگەن جانە زەرەكتىگىمەن ەرەكشەلەنگەن بوزبالالارعا باسىمدىلىق بەرىلەتىنى ءسوزسىز.

سپورتتىق جانە وزگە دە سالالارداعى ەلەۋلى جەتىستىكتەرى اسكەري بورىشتارىن ءدال وسى پرەزيدەنتتىك پولكتەردە وتەۋگە جولداما رەتىندە قاراستىرىلاتىنىن ايتا كەتكەن ءجون.