الماتى زووباعىنىڭ بولاشاقتا قالاي تۇرلەنەتىنى جايلى باسپا ءسوز ءماسليحاتى بارىسىندا زووباق باسشىسى ايگۇل تولەيەۆا ايتىپ بەردى.

بيىل 12 عيماراتتى جوندەۋگە 236 ملن تەڭگە بولىنگەن. قۇرىلىس-مونتاج جۇمىستارى جاقىن ارادا باستالىپ، جىل سوڭىنا دەيىن جالعاسپاق.

«جوندەۋ جۇمىستارى بارىسىندا ءبىز جەلدەتۋ جۇيەسىن دە جوندەيتىن بولامىز. ءقازىر زووباقتىڭ ىشىنەن جاعىمسىز ءيىس شىعاتىنى راس. ەندى پىلدەردىڭ، لەوپاردتاردىڭ، كەنگۋرۋ، مەن ءبىرقازانداردىڭ قىسقى ۇيلەرىندەگى جەلدەتكىش جۇيەسى تولىق جاسالاتىن بولادى»، - دەدى ايگۇل تولەيەۆا.

ءقازىر قۇرىلىس جۇمىستارى الماتى زووباعىن قايتا جاڭعىرتۋ جوباسىنا ساي جۇرگىزىلىپ كەلەدى.

نەمىس ساۋلەتشىسى پيتەر رازباحتىڭ جوباسى بويىنشا الماتى زووباعى توكسونوميالىق تيپتەن كونتينەنتالدى تيپكە تۇرلەنبەك.

اتاپ ايتقاندا، پىلدەر، زەبرالار مەن كەرىكتەر ءبىر ارەالدا ءومىر سۇرەتىن بولادى.

ءقازىر قار بارىستارى مەن ايۋ-قاسقىر كەشەندەرى بويىنشا جوبالىق سمەتالىق قۇجاتتاما دايىن تۇر.

«قار بارىسى ەكسپوزيسياسىندا ەكى ەرەسەك بارىس پەن كۇشىكتەرى تۇراتىن بولادى. اۋماعى 3 773 شارشى مەتر، ۆولەر اۋماعى 618 شارشى مەتر، سۋات كولەمى 8،9 شارشى مەتر بولماق. ايۋ-قاسقىر ەكسپوزيسياسىندا 4 ەرەسەك قارا ايۋ، 4 ەرەسەك گيمالاي ايۋى، 8 قاسقىر ءومىر سۇرەتىن بولادى.

ولاردىڭ تۇرعىن جايىنىڭ كولەمى 8 932 شارشى مەتر بولماق»، - دەدى ايگۇل تولەيەۆا.

ونىڭ ايتۋىنشا، ۆەتەرينارلىق ەمحانانىڭ جوبالىق سمەتالىق قۇجاتتاماسى دايىندالىپ جاتىر.

وسى ۋاقىتقا دەيىن گيمالاي ايۋلارى مەن اق ايۋلاردىڭ، جولبارىستاردىڭ، تاپيرلەردىڭ ەكسپوزيسيالارى قايتا جوندەلدى. زووباقتىڭ ەكزوتاريۋمى قايتا جاسالدى.

«بيىل 29 ناۋرىزدا اكۆاريۋم اشىلدى. العاش رەت اكاريۋمدا 25 توننالىق باسسەين پايدا بولدى. قۇستار ءۇيى قايتا جاسالدى»، - دەدى زووباق باسشىسى.