الماتى زووپاركىندە قازاقستانداعى الىپ جىلان ءومىر سۇرەدى. ول جۋىق ارادا الەم زووپاركتەرىندەگى ەڭ ءىرى جىلانداردىڭ ءبىرى بولۋى ىقتيمال.

جالپى الەم بويىنشا اناكوندا مەن تورلى پيتون جىلانداردىڭ ىشىندە الىبى بولىپ سانالادى. 2003 جىلى جۇمىرتقادان شىققان 10 سانتيمەترلىك ساندرا (لاقاپ اتى) 15 جىل ىشىندە ايتارلىقتاي وسكەن. نەگىزى تورلى جىلاندار ءومىر بويى ۇزارىپ ءوسىپ تۇرادى.

«بۇگىن ءبىز ونى ولشەدىك. ول 2018 جىلعى 1 مامىرداعى ولشەۋ ناتيجەسىنە سايكەس 5 م 10 سم قۇرادى. جىلاننىڭ ورتاشا سالماعى 80 كگ. ونىڭ مىنەزى شاتاق، ەڭ دۇرىسى وعان ارتىق تيسۋگە بولمايدى. بيىل تورلى جىلانعا 15 جىل تولادى»، - دەيدى الماتى زووپاركى.

زووپارك ماماندارى مۇنداي ۇزىندىقتاعى جىلانداردى ولشەۋ قيىن ءارى ءقاۋىپتى ەكەندىگىن العا تارتىپ وتىر.

سەنىمدى اقپارات كوزدەرىنە قاراعاندا، الەمدەگى ەڭ ۇزىن تورلى جىلان 7،5 مەتردى قۇرايدى.