الماتىدا 4 بىردەي حالىققا قىزمەت كورسەتۋ ورتالىعى جۇمىسىن توقتاتتى.

الماتىدا ءبىر كۇننىڭ ىشىندە 4 بىردەي حالىققا قىزمەت كورسەتۋ ورتالىقتارى جۇمىسىن توقتاتتى. بۇل قىزمەت كورسەتۋ ورىندارىنىڭ جابىلۋىنا حالىقتىڭ وتە از كەلۋى سەبەپ. ونىڭ ۇستىنە، كورسەتىلەتىن مەملەكەتتىك قىزمەتتەردىڭ دەنى ساندىق جۇيەگە اۋىسقان. تۇرعىندار كوپ جۇمىستارىن ءموبيلدى قوسىمشا ارقىلى تىندىرادى. سوندىقتان المالى اۋدانىنداعى، بوستاندىق، جەتىسۋ جانە تۇركسىب اۋدانىنداعى فرونت وفيستار جابىلعان.

«مۇنىڭ ءبارى «سيفرلىق قازاقستان» باعدارلاماسى اياسىندا ىستەلىپ جاتقان شارۋالار. ويتكەنى بۇگىنگى كۇنى ەلىمىز بويىنشا «سيفرلىق قازاقستانعا» حالىق قىزمەت كورسەتۋ ورتالىقتارىنىڭ ماماندارى وقىتۋلار وتكىزىپ جاتىر. بۇكىل مەكەمەلەرگە بارىپ، وقىتۋلار وتكىزىپ جاتىر. سونىڭ سالدارىنان ءبىزدىڭ ساۋاتتى ازاماتتاردىڭ سانى ارتىپ وتىر»، - دەدى الماتى قالاسى حالىققا قىزمەت كورسەتۋ ورتالىعى دەپارتامەنتى قوعاممەن بايلانىس جونىندەگى مەنەدجەرى جاڭىل اپەتوۆا.

جابىلعان حالىققا قىزمەت كورسەتۋ ورتالىقتارىنىڭ ءار قايسىسىندا 15-16 ادامنان جۇمىس ىستەگەن ەكەن. ولاردىڭ بارلىعى قالاداعى باسقا فرونت وفيستارعا جۇمىسقا ورنالاسىپتى. ماماندار وسى كۇنى ءموبيلدى قوسىمشا ارقىلى مەملەكەتتىك قىزمەت الۋدى ۇيرەتىپ ءجۇر. جىل باسىنان بەرى 13 مىڭ ادام وقىتىلعان. تۇرعىنداردىڭ وزدەرى دە بۇرىنعىداي ۇزىن-سونار كەزەكتە تۇرماي، ەلەكتروندى قىزمەت ارقىلى جۇمىستارىمىزدى جىلدام بىتىرەمىز دەيدى.