بيىل الماتى زووباعى جاڭا كەيىپكە ەنسە، ونىڭ اۋماعىندا جاس ناتۋراليستەر مەكتەبىن اشۋ جوسپارلانۋدا. تابيعاتپەن ەتەنە بولعىسى كەلەتىندەر جانۋارلار، وسىمدىكتەر تۋرالى ىلىمدەرىن جەتىلدىرە الادى. زووباقتا جاقىندا جاڭا تۇرعىندار پايدا بولدى. فرانسيادان لەمۋرلار جەتكىزىلسە، پوني مەن ەشكىلەر تولدەدى.

زووباقتا ءقازىر تولدەۋ ماۋسىمى باستالدى. شوتلانديالىق پونيلار جىلىنا ءبىر رەت قانا قۇلىندايدى. پريماتتار بولىمىندە دە تولىعۋ بار. شەتەلدەن اكەلگەن لەمۋرلارعا قىزمەتكەرلەر «اي» مەن «كۇن» دەگەن ات بەرىپتى. قىسقا مەرزىمنىڭ ىشىندە كەلۋشىلەردىڭ سۇيىكتىلەرىنە اينالعان ولارعا چەحيادان تاعى 4 لەمۋر قوسىلادى. 

«بۇل لەمۋردى كوپتەن كۇتكەن بولاتىنبىز. ارماندار ورىندالادى دەپ 23 ناۋرىز كۇنى ءبىزدىڭ ارمانىمىز ورىندالىپ، وسى لەمۋر لاريدى الدىق. ەندى چەحيادان 4 باسىن كۇتىپ وتىرمىز. ءبارى كوبەيىپ، ۇلكەن توپ بولىپ، وسى شاردا تۇراتىن بولادى»، - دەدى پريماتتار ءبولىمىنىڭ مەڭگەرۋشىسى شولپان ابدىبەكوۆا.

اققۋلار دا بالاپاندارىن باسىپ شىعارعان. تاعى ءبىر جۇپ تولىعۋدى كۇتۋدە. الايدا، اققۋلار وتە قىزبا كورىنەدى. قاناتىنىڭ كۇشتىلىگى سونشالىق، ءتىپتى ادامنىڭ قولىن سىندىرۋعا قاۋقارى بار ەكەن. سوندىقتان ماماندار ولاردى تاماقتاندىراردا ساق بولۋعا شاقىرادى. دجامبو اتتى سۋسيىر مەن فرانسيادان اكەلگەن قۇربىسى ەكەۋىندە جانە ورمان اتتى امۋر بارىسىندا جاقىن ارادا تولدەۋى بەك مۇمكىن. تەڭبىل ءتۇستى جانۋار تۇرلەندىرۋ باعدارلاماسىنا قاتىسىپ، ۆلاديۆوستوكتان اكەلىنەتىن تايگا اتتى تەڭىن كۇتۋدە. بۇل جوسپارلاردى ورىنداۋ ءۇشىن جنۋارلارعا قولايلى جاعداي جاسالىپ جاتىر. جەلتوقسان ايىندا جاڭا ەكسپوزيسيالار قۇرىلىسى باستالادى.

«ەكى قۇرىلىمنىڭ قۇرىلىسىن باستاۋدى جوسپارلاپ وتىرمىز. ول قار بارىسى، ايۋلار مەن قاسقىرلارعا ارنالعان مەكەندەر. ايۋ مەن قاسقىرعا ءبىر قۇرىلىم سالىنادى. ءقازىر ءبىز قورشاۋ دەگەن ءسوزدى پايدالانباۋعا، ونىڭ ورنىنا ءومىر ءسۇرۋ قالپى دەگەندى ءجون كورەمىز. تابيعاتتا ەركىن ءومىر سۇرۋىنە جاعداي جاساۋعا تىرىسامىز»، - دەدى الماتى زووباعى ديرەكتورىنىڭ مىندەتىن اتقارۋشى ايگۇل تولەيەۆا.

ال العاش پايدا بولعان 25 توننالىق اكۆاريۋم باقتىڭ ماقتانىشىنا اينالعان. وعان اكۋلالار مەن مۋرەنالار جىبەرىلگەن. سۋ جانۋارلارى سيرەك كوزگە كورىنگەنىمەن، بەينەتاسپامىزعا تۇسىرە الدىق. كەلۋشىلەردى كلوۋن-بالىقتار، حيرۋرگ-بالىقتار، تەڭىز كىرپىلەرى مەن مەدۋزالار ەرەكشە قىزىقتىرادى. 

«ءبىز الماتى زووباعىن تاماشالاۋعا ارنايى وسكەمەننەن كەلدىك. ءبىرىنشى كەزەكتە بالالارىم مەن نەمەرەلەرىم باي تاريحى بار وسى ورىندى تاماشالاۋدى قالاپ ەدى. ءبىزدىڭ قالادا جوق جانۋارلار وسىندا ەكەن. العان اسەرىمىز ەرەكشە»، - دەدى  زاۋرە مۇباراكوۆا.

بيىل جازدا زووباق جانىنان زوومەكتەپ اشۋ جوسپارلانۋدا. تابيعات جاناشىلارلارىنا فلورا مەن فاۋنا تۋرالى ءىلىم بەرىلەدى. جەلتوقسان ايىندا جانۋارلاردىڭ قىسقى مەكەندەرىنە اعىمداعى جوندەۋ جۇمىستارى جۇرگىزىلەدى. ول ءۇشىن جەرگىلىكتى قازىنادان 237 ميلليون تەڭگە قاراستىرىلىپ وتىر.