باتىس قازاقستان وبلىسىنىڭ ايتىسكەر اقىنى، حالىقارالىق ايتىس اقىندارى مەن جىر-تەرمەشىلەر وداعىنىڭ مۇشەسى باۋىرجان شيرمەدين ۇلىنىڭ «قالاعا حات» اتتى جىر كەشى ءوتتى.

شارا باۋىرجان وقىعان ج. دوسمۇحامەدوۆ اتىنداعى ورتا مەكتەپ-بالاباقشا كەشەنىنەن باستاۋ الدى. جاھانشانىڭ ءمۇسىنى ورناتىلعان الاڭدا كەش قوناقتارىنا مەكتەپ وقۋشىلارى ادەبي مونتاج قويىپ، ولەڭدەر وقىدى. قوناقتار الاش مۋزەيىندە دە بولىپ، الاش ارىستارىنىڭ وتكەن ومىرىمەن، تاعدىرىمەن تانىستى.

كەشتىڭ نەگىزگى ءبولىمى اۋداندىق مادەنيەت ۇيىندە باۋىرجان شيرمەدين ۇلى تۋرالى كىتاپ كورمەسىنەن باستالىپ، ونىڭ اۆتورلىق فوتوسۋرەتتەرى دە حالىق نازارىنا ۇسىنىلدى.

باۋىرجاننىڭ «داپتەر» اتتى العاشقى ولەڭدەر جيناعىنىڭ تۇساۋكەسەرىنە حالىق كوپ جيىلدى. زالدا بوس ورىن بولماعان سوڭ، اياقتىڭ تالعانىنا قاراماستان، تىك تۇرعان كۇيىندە ءتورت ساعاتقا سوزىلعان كەشتىڭ سوڭىنا دەيىن ولەڭ تىڭداعان كورەرمەندەر دە بولدى.

ب. شيرمەدين ۇلىنىڭ جىر كەشىنىڭ 22 مامىرعا قويىلۋىنىڭ سەبەبى، بۇل ونىڭ اناسىنىڭ تۋعان كۇنىنە جاساعان سىيى ەكەن. اناسى، اپاسى تۋرالى ولەڭ وقىپ، زالدا وتىرعان اناسى مايراعا گۇل سىيلادى.

كەشتى اقىن ادامعا ۇلكەن وي سالار، تۋعان جەرگە، اۋىلعا دەگەن ماحاببات پەن ساعىنىشتىڭ وتىن مازداتاتىن، اۋىلدىڭ تىرلىگىن كوز الدىڭا دوڭگەلەتىپ اكەلەتىن «قا-لاعا حات» ولەڭىمەن اياقتادى.

سىرىم اۋدانى اكىمى تولەگەن تورەعالييەۆ «نەبىر الىپ تا، سىرىمداي، جاھانشاداي باتىر دا، ابدوللا مەن قادىرداي اقىن دا انادان تۋىلدى. سوندىقتان بۇگىنگى توي، بۇگىنگى قۋانىش باۋىرجاننىڭ اناسى مايرا اپامىزدىڭ قۋانىشى. بالاڭىزدىڭ ەل الدىنداعى ابىرويىن كورىپ وتىرسىز. جاسىڭىز قۇتتى بولسىن!»، – دەپ مايرا اپايدىڭ باسىنا ورامال جاۋىپ، قامزول كيگىزىپ، قۇرمەت كورسەتتى». بالامنىڭ جەتىستىگىن، ونى قاۋمالاپ كەلگەن وسىنداي ەلدى كورىپ وتىرعان مەن الەمدەگى ەڭ باقىتتى انامىن. باۋىرجان – تەك مەنىڭ بالام ەمەس، ەلدىڭ بالاسى»، – دەپ اقىننىڭ اناسى تەبىرەنە العىسىن ايتتى.