ەلوردالىق «استانا بالەت» تەاترى الماتىعا 3 كۇنگە گاسترولدىك ساپارمەن كەلدى. شىعارماشىلىق ۇجىم استانانىڭ 20 جىلدىق مەرەيتويى اياسىندا تۋىندىلارىن تارتۋ ەتەدى. تەاتر گرۋپپاسى ەلىمىزدىڭ حورەوگرافيا ونەرىنىڭ زاماناۋي جانە ۇلتتىق ۇلگىلەرىن كورسەتپەك. ونەرپازدار نەوكلاسسيكا شەديەۆرى دجوردج ءبالانچيننىڭ «سەرەناداسى» مەن وتاندىق بالەتمەيستەر مۋكارام ءاۆاحريدىڭ «جۋسان» سپەكتاكلىن ۇسىنادى. ءدال ءقازىر اباي اتىنداعى بالەت جانە وپەرا تەاترىنان تىكەلەي ەفيرگە ارىپتەسىم جادىرا ومارجان قوسىلۋعا دايىن تۇر. قايىرلى كەش! جادىرا، قوس قويىلىمنىڭ ەرەكشەلىگى قانداي؟
قايىرلى كەش، توعجان! ءيا، وسىدان شامامەن 30 مينۋت بۇرىن باستالعان «استانا بالەت» تەاترىنىڭ ونەرى كوپتى ءتانتى ەتتى. ويتكەنى، شىعارماشىلىق ۇجىم الەمدىك بالەت جاۋھارلارىن كورسەتپەك. جوعارىدا ايتىپ وتكەن، قوس قويىلىم دا ءمىنسىز ستيل مەن عاجايىپ حورەوگرافياسىمەن ەرەكشەلەنەدى. ماسەلەن، «سەرەنادا» سپەكتاكلى «استانا بالەت» تەاترىنىڭ ساحناسىندا العاش رەت دجوردج بالانچين قورىنىڭ قولداۋىمەن قويىلىپ، حورەوگرافتىڭ مانەرى مەن تەحنيكاسىنىڭ ستاندارتتارىنا ساي جاسالدى. بالانچين قويىلىمىندا قاراپايىم كوستيۋمدەر، جەڭىل دەكوراسيالار قولدانىدالادى. ەڭ باستىسى - مۋزىكا مەن ءبيدىڭ ۇندەستىگى. «استانا بالەت» تەاترىنىڭ ارتىستەرى وزدەرى ءۇشىن دە تىڭ حورەوگرافيادا اسەم دە اسقاق ءبيدى، پلاستيكالىق سۋرەتتىڭ ناقتىلىعىن پاش ەتىپ، نەوكلاسسيكا شەديەۆرىنە جان ءبىتىردى.
«سپەكتاكلدىڭ ەرەكشەلىگى - بۇل جەردە قىزداردا، ۇلداردا قوسىلىپ ونەر كورسەتەمىز جانە ءار كەزدە، ءار جىلدارى بولعان جاعدايلاردىڭ ۇزىندىلەرىن كورۋگە بولادى. سول جاعىنان ەرەكشە. ءارى كوستيۋم جاعىنان دا كىشكەنە زاماناۋي قىلىپ قويىلعان. كىشكەنە قازاق بي ونەرىمەن قازىرگى زاماناۋي بالەتتى قوسىپ الىپ شىعامىز»، - دەدى «استانا بالەت» تەاترىنىڭ جەتەكشى ءسوليسى ريزا قانات قىزى.
زاماناۋي بالەتمەيستەر مۋكارام ءاۆاحريدىڭ «جۋسان» اتتى ءبىر اكتىلى بالەتى حورەوگرافيا تىلىمەن ورنەكتەلگەن حالقىمىز بەن دالامىزدىڭ تاريحى. تەرەڭ مازمۇنعا تولى، ەرەكشە سپەكتاكلدە قۋات شىلدەبايەۆتىڭ، سەرگەي راحمانينوۆتىڭ، كارل دجەنكينستىڭ مۋزىكاسى شىرقالادى. قۋات شىلدەبايەۆتىڭ اۋەندەرى سپەكتاكلدىڭ نەگىزگى قازىعىنا اينالعان. بالەت دالا تىنىسى مەن تۋعان ءۇيدىڭ جىلىلىعىنا، قاسىرەت ازابى مەن قايتا دامۋ قۋانىشىنا، اسەم سۇلۋلىق پەن وتانعا دەگەن ماحاببات سەزىمىنە تولى. ال 5 مامىر كۇنى «استانا بالەت» تەاترى كورەرمەن نازارىنا ەكسترەمالدى تەحنيكا، تىنىمسىز قيمىل مەن قارقىندى مۋزىكا ىرعاعىنا قۇرالعان ۋيليام فورسايتتىڭ «In the Middle، Somewhat Elevated» اتتى سپەكتاكلى ۇسىنادى. ۋيليام فورسايت بالەتى - دەكوراسياسىز، اسكەتتىك كوستيۋمدەر، ىرعاقتى مۋزىكا، ەرەكشە بالەت تەحنيكاسى مەن ادام ءتانىنىڭ مۇمكىندىگىنىڭ شەگىندە ورىندالعان تىنىمسىز قيمىل اعىنىن سيپاتتايدى.
«ءبىز بيىلعى گاسترولدىك ساپارىمىزدى تولىقتاي استانانىڭ 20 جىلدىعىنا ارنايمىز. سوندىقتان ءبىز ەڭ تاڭداۋلى دەگەن سپەكتاكلدەردى الدىق. الماتىدان سوڭ تالدىقورعانعا، اقتاۋعا بارامىز. قۇرامىمىزدا 60 ءارتىس بار. ارالارىندا شەتەلدىك تاجىريبەلى ارتىستەردە ونەر كورسەتەدى»، - دەدى «استانا بالەت» تەاترىنىڭ ديرەكتورى ۆالەريي كۇزەمبايەۆ.
رەپەرتۋارىنىڭ الۋان-تۇرلىلىگى، ورىنداۋشىلىق دەڭگەيى مەن سپەكتاكلدەردىڭ ساحنالىق بەزەندىرىلۋى ارقاسىندا «استانا بالەت» تەاترىنىڭ شىعارماشىلىعى ەلىمىزدە عانا ەمەس، دۇنيەجۇزىندە دە ەرەكشە قوشەمەتكە يە. ەسكە سالا كەتەيىك، «استانا بالەت» تەاترى 2012 جىلى مەملەكەت باسشىسىنىڭ باستاماسىمەن قۇرىلدى. ۇجىم كلاسسيكالىق ءداستۇر مەن حالىق جانە زاماناۋي حورەوگرافيانىڭ تەندەنسيالارىن بىرىكتىرىپ، ەشكىمگە ۇقسامايتىن تىڭ بەينە مەن ستيل جاساقتايدى. باتىل ەكسپەريمەنتتەر جاساپ، جاڭا بەينەلەر ىزدەپ، سپەكتاكلدەردىڭ قويىلىمى مەن ستيليستيكاسىن ءسان-تۇرلى ەتەدى؛ كورەرمەندەرىن جاڭا سپەكتاكلدەرىمەن جانە كونسەرتتەرىمەن قۋانىشقا بولەپ كەلەدى
