الماتىدا ۇلى وتان سوعىسىنىڭ ارداگەرلەرىنە كومەك اكسياسى باستالدى. مايدانگەرلەردى  ازىق-تۇلىك، دارى-دارمەك سىندى قاجەتتىلىكتەرمەن قامتاماسىز ەتۋدى «بولاشاق» قاۋىمداستىعى ۇيىمداستىرىپ جاتىر. ولار جەڭىس كۇنىنە دەيىن قالاداعى 60 قارت جاۋىنگەردىڭ جاعدايىن ءبىلىپ، قۇتتىقتاپ شىقپاق. قايىرىمدىلىق شاراسىن ۇيىمداستىرۋشىلاردىڭ ايتۋىنشا،  قاجەتتى قارجىنى «بولاشاق» باعدارلاماسىمەن شەتەلدە وقىپ كەلگەن تۇلەكتەر جيناعان. ولار بيىل ءبىر ميلليون تەڭگەنىڭ قايىرىمدىلىعىن جاساۋدى جوسپارلاپتى. 

«اشتىقتى كوردىم 7-8 جاسىمدا، 1931-1932 جىلى. ودان كەيىن 1937-1938 جىلى حالىقتىڭ  جىلاعانىن، ناقاقتان سوتتالىپ جاتقانىن كوردىم. سوعىسقا باسىنان اياعىنا دەيىن قاتىناستىم. ءومىردىڭ جاقسىلىعىندا، قيىنشىلىعىندا كوردىم. ومىرگە قاناعات دەيمىن. 95- كە كەلدىم»، - دەدى ۇلى وتان سوعىسىنىڭ ارداگەرى  ولجاباي تەمىرحانوۆ.

بولاشاقتىقتار بۇگىنگى كۇنگە دەيىن الماتىداعى 45 ارداگەرگە بارىپ، ولاردىڭ حال-احۋالىن ءبىلىپ شىققان. ايتۋلارىنشا، ارداگەرلەردىڭ اراسىندا دەنساۋلىعىمەن قاتار، تۇرمىسى دا ناشار ادامدار از ەمەس. تىپتەن، كوپتەگەن قارت مايدانگەرلەر كومەك سۇراپ ءجيى حابارلاسادى، دەدى قاۋىمداستىق وكىلدەرى.

«الماتى قالاسىندا قازىرگى كۇنى 800-دەي اراداگەر عانا قالىپتى. جىل سايىن ولاردىڭ سانى ازايۋدا. دەنساۋلىعىنا قاراساق، جاستارىنىڭ ءبارى توقساننان  اسقان.  70-كە جۋىق اراداگەرلەردىڭ ءالى ەسى بار، دەنساۋلىعى بار، سويلەي الادى، جاقسى اڭگىمە ايتادى. 20-25 پايىزى توسەك تارتىپ جاتىر. جاعدايلارىنا قاراعاندا ەندى مۇقتاج جاندار وتە كوپ. اسىرەسە، ورىس حالقىنىڭ  اراسىندا ءبىر وزدەرى تۇرادى. بالالارى دا تۇرمايدى قاستارىندا. ارداگەرلەر بىزگە حابارلاسىپ تۇرادى. قارنىمىز اشىپ جاتىر، تاماق جوق دەپ. جاعدايى وتە ناشار اراداگەرلەردە بار»، - دەدى «بولاشاق» قاۋىمداستىعى الماتى قالاسى فيليالىنىڭ ديرەكتورى قىمبات ابدىكەرىموۆا.