الماتى وبلىسىندا بيىل اگروونەركاسىپتىك كەشەندى دامىتۋ باعىتىندا جالپى قۇنى 44،6 ملرد تەڭگەنى قۇرايتىن 7 ينۆەستيسيالىق جوبانى ىسكە اسىرۋ جوسپارلانىپ وتىر. جوبالار اۋىل شارۋاشىلىعى ءوندىرىسىن كەڭەيتىپ، ءوڭىردىڭ ازىق-تۇلىك قاۋىپسىزدىگىن ارتتىرۋعا جانە جاڭا جۇمىس ورىندارىن قۇرۋعا باعىتتالعان.

الماتى وبلىسىنىڭ اۋىل شارۋاشىلىعى باسقارماسىنىڭ مالىمەتىنشە، اتالعان جوبالار اگروونەركاسىپ سالاسىنا ينۆەستيسيا تارتۋ ارقىلى وڭدەۋ ونەركاسىبىن دامىتۋعا جانە اۋىل شارۋاشىلىعى ونىمدەرىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى.

سونىمەن قاتار، اۋىل شارۋاشىلىعى تاۋار وندىرۋشىلەرىن قولداۋ ماقساتىندا ءبىرقاتار مەملەكەتتىك باعدارلامالار جۇزەگە اسىرىلىپ جاتىر. سولاردىڭ ءبىرى – «سقو تاجىريبەسىمەن اوك سالاسىنداعى ينۆەستيسيالىق جوبالاردى نەسيەلەۋ باعدارلاماسى». باعدارلاما اياسىندا 4 ملرد تەڭگە قاراستىرىلىپ، ەكى جوبا قارجىلاندىرىلدى. اتاپ ايتقاندا، سۋ ۇنەمدەۋ تەحنولوگيالارىن ەنگىزۋگە باعىتتالعان «Alfalfa» ج ش س جوباسىنا 1،5 ملرد تەڭگە، ال جۇگەرىنى قايتا وڭدەۋ زاۋىتىن كەڭەيتۋ جوباسىنا «ازيا اگرو فۋد» اق-نا 2،5 ملرد تەڭگە ءبولىندى.

بۇدان بولەك، 2026 جىلى وسى باعدارلاما شەڭبەرىندە 5 ملرد تەڭگەگە تاعى 4 جوبانى ىسكە اسىرۋ جوسپارلانعان.

الماتى وبلىسىنىڭ اۋىل شارۋاشىلىعى باسقارماسىنىڭ باسشىسى ديماش سىدىقوۆتىڭايتۋىنشا، وڭىردە اگروونەركاسىپ سالاسىنا ينۆەستيسيا تارتۋ – اۋىل شارۋاشىلىعىن جاڭعىرتۋدىڭ نەگىزگى باعىتتارىنىڭ ءبىرى.
«بيىل ىسكە اساتىن جوبالار وڭىردەگى اگروونەركاسىپتىك كەشەننىڭ وندىرىستىك الەۋەتىن ارتتىرىپ، زاماناۋي تەحنولوگيالاردى ەنگىزۋگە مۇمكىندىك بەرەدى. بۇل ءوز كەزەگىندە ءونىم كولەمىن ۇلعايتىپ قانا قويماي، اۋىل شارۋاشىلىعى ونىمدەرىن تەرەڭ وڭدەۋدى دامىتۋعا جانە جاڭا جۇمىس ورىندارىن اشۋعا جول اشادى»، – دەدى ديماش سىدىقوۆ.

سونىمەن قاتار، اۋىل شارۋاشىلىعى مينيسترلىگى مەن «بايتەرەك» ۇلتتىق باسقارۋشى حولدينگى بىرلەسىپ قالىپتاستىرعان «ينۆەستيسياعا تاپسىرىس» اياسىندا جالپى قۇنى 708،7 ملرد تەڭگەنى قۇرايتىن 26 جوبانى قارجىلاندىرۋ مۇمكىندىگى قاراستىرىلىپ جاتىر.

ايتا كەتەيىك، 2025 جىلى الماتى وبلىسىنىڭ اگروونەركاسىپتىك كەشەنىنە تارتىلعان ينۆەستيسيا كولەمى (الكوگولدى سۋسىنداردى ەسەپكە الماعاندا) 178،2 ملرد تەڭگەنى قۇراپ، جوسپار 145،4%-عاورىندالدى. جوسپار بويىنشا 122،6 ملرد تەڭگە كوزدەلگەن ەدى.

سونداي-اق، بەكىتىلگەن جول كارتاسى اياسىندا وتكەن جىلى جالپى قۇنى 29 ملرد تەڭگەنى قۇرايتىن 14 جوبا ىسكە اسىرىلدى. ولاردىڭ قاتارىندا 9 ءسۇت فەرماسى، 1 جىلىجاي كەشەنى، 1 بالىق شارۋاشىلىعى، 1 كوكونىس قويماسى، 1 ۆافەلدى نان ونىمدەرىن وندىرەتىن زاۋىت جانە 1 قۇس فابريكاسى بار.