قونايەۆ قالاسىندا مەملەكەت باسشىسىنىڭ «تازا قازاقستان» باعدارلاماسى اياسىندا، ناۋرىز مەرەكەسىنە وراي «تابيعات قاناتىندا - Taza Life» اتتى ەكولوگيالىق اكسيا ءوتتى. شارانى الماتى وبلىستىق جاستار رەسۋرستىق ورتالىعى، ءبىلىم باسقارماسى جانە ورمان شارۋاشىلىعى مەكەمەلەرى ۇيىمداستىردى.

ءىس-شارانىڭ ماقساتى - جاستاردىڭ ەكولوگيالىق مادەنيەتىن قالىپتاستىرۋ، قۇستارعا قامقورلىق جاساۋعا جانە تابيعاتتى ايالاۋعا باۋلۋ. اكسيا بارىسىندا قاتىسۋشىلار ءوز قولدارىمەن جاساعان قۇس ۇيالارىن ورناتتى.

- "كوكتەممەن بىرگە تۋعان ولكەگە قايتا ورالعان قۇستارعا قامقورلىق كورسەتۋ – قورشاعان ورتاعا دەگەن جاۋاپكەرشىلىكتىڭ ايقىن كورىنىسى. ەلىمىزدە مۇنداي اۋقىمدى اكسيا وتكەن جىلى العاش رەت الماتى وبلىسىندا وتكىزىلدى. سول كەزدە مىڭعا جۋىق قۇس ۇياسى دايىندالىپ، ارنايى ورىندارعا ورناتىلدى. بيىل بۇل كورسەتكىش ودان دا جوعارى. بۇل باستاما وسكەلەڭ ۇرپاقتى تابيعاتتى قورعاۋعا، مەيىرىمدىلىك پەن ىزگىلىككە تاربيەلەيدى. اكسيا وبلىستىڭ بارلىق اۋداندارى مەن قالالارىندا ءساۋىر ايىنىڭ سوڭىنا دەيىن جالعاسادى"، - دەدى وبلىستىق جاستار رەسۋرستىق ورتالىعىنىڭ ديرەكتورى ماقسات كەنەشوۆ.

- "قورشاعان ورتانى قورعاۋ – ءار ادامنىڭ مىندەتى. ەركىندىكتىڭ سيمۆولىنا اينالعان قۇستارعا كومەگىم تيگەنىنە قۋانىشتىمىن"، - دەدى قونايەۆ قالاسىنداعى شوقان ءۋاليحانوۆ اتىنداعى №2 گيمنازيانىڭ وقۋشىسى ءالىمجان تۇردالييەۆ.