وڭىردە بارلىعى 677 ساياجاي قاۋىمداستىعى بار، ولاردىڭ 367ء-سى 2023 جىلدان بەرى ەلدى مەكەندەر قۇرامىنا ەنگىزىلدى.

ساياجاي القاپتارىنىڭ ەڭ كوبى قاراساي اۋدانىندا – 203، ىلە اۋدانىندا – 118، تالعار اۋدانىندا – 151، ەڭبەكشىقازاق اۋدانىندا – 135، سونداي-اق جامبىل اۋدانىندا – 21. قونايەۆ جانە الاتاۋ قالالارىندا تيىسىنشە 9 جانە 40 ساياجاي القابى ورنالاسقان.

2025 جىلى ءتورت ەلدى مەكەننىڭ قۇرامىنا 23 باۋ-باقشا قاۋىمداستىعىن ەنگىزۋ ءۇشىن قالا قۇرىلىسى قۇجاتتاماسىن دايىنداۋ اياقتالدى. قازىرگى ۋاقىتتا شەكارالاردى وزگەرتۋ جۇمىسى جۇرگىزىلۋدە. وسىدان كەيىن ساياجاي تۇرعىندارى رەسمي تۇردە اۋىل تۇرعىنى مارتەبەسىنە يە بولادى. ماسەلەن، قاراساي اۋدانىندا كولاششى اۋىلىنا «ءايمولدىر» باۋ-باقشا قاۋىمداستىعىن جانە اتاۋى جوق تاعى ءبىر القاپتى قوسۋ جوسپارلانعان.

تۇرار اۋىلىنا ءبىر ساياجاي القابى، ال بەكبولات اۋىلىنا «سايان» باۋ-باقشا قاۋىمداستىعى ەنگىزىلەدى. ەڭبەكشىقازاق اۋدانىندا ازات اۋىلىنىڭ قۇرامىنا «ەنتۋزياست»، «الماگۇل 2»، «ارمان 2»، «زۆەزدوچكا»، «ۆيكتوريا»، «دوستىق» جانە باسقا دا ءبىرقاتار باۋ-باقشا سەرىكتەستىكتەرى قوسىلادى. بيىل تاعى ءۇش ەلدى مەكەن بويىنشا قۇجاتتار ازىرلەنىپ، ولاردىڭ قۇرامىنا 47 ساياجاي سەرىكتەستىگىن ەنگىزۋ جوسپارلانىپ وتىر. اتاپ ايتقاندا، ەڭبەكشىقازاق اۋدانىندا بولەك اۋىلىنا «كيروۆەس-37»، «درۋجبا»، «تاۋگۇل»، «جەتىسۋ»، «ەسىك»، «روماشكا» جانە باسقا دا ونداعان القاپتى قوسۋ كوزدەلگەن.

قاراساي اۋدانىندا ۇلان جانە كەمەرتوعان اۋىلدارى قۇرامىنا «كاشتان»، «جايىق»، «شىعىس اگرو»، «نۇر پلازا»، «ناۆات» جانە «الاش وردا» القاپتارى ەنگىزىلەدى.

جەردىڭ نىسانالى ماقساتىن وزگەرتۋ ماسەلەسى ساياجاي تۇرعىندارى ءۇشىن وزەكتى بولىپ قالا بەرەدى. بۇل مۇمكىندىك ەلدى مەكەندەردىڭ باس جوسپارى مەن قالا قۇرىلىسى قۇجاتتاماسىنا سايكەستىگىنە بايلانىستى قاراستىرىلادى. ياعني نىسانالى ماقساتتى وزگەرتۋ تەك باس جوسپار مەن ەگجەي-تەگجەيلى جوسپارلاۋ جوبالارىنا سايكەس كەلگەن جاعدايدا عانا رۇقسات ەتىلەدى.