الماتىدا بەسىنشى جىل قاتارىنان «ماڭگىلىك پولك» شەرۋى ۇيىمداستىرىلدى. بيىل كوشەلەر بويىمەن 100 مىڭنان اسا الماتىلىق پەن قالا قوناقتارى باتىرلارىنىڭ سۋرەتىمەن ءجۇرىپ ءوتتى. بۇل ۇلى وتان سوعىسىنا قاتىسىپ، جەڭىس جالاۋىن جەلبىرەتكەن جاۋىنگەرلەرگە كورسەتىلگەن قۇرمەت. ءاربىر سۋرەت وزىنشە ءبىر تاريح.

ماقتانىش، كۇلكى مەن ساعىنىش كوز جاسى. ماڭگىلىك پولكقا كەلگەن ءاربىر ازامات وسى كۇيلەردىڭ ءبىرىن باسىنان كەشەرى ءسوزسىز. قولدارىنا ۇستاعان سۋرەتتەردەگى تاعدىرلار دا ءارتۇرلى. ءبىراق بۇل ءبىزدىڭ ورتاق تاريحىمىز. مايدانگەرلەردىڭ قانىمەن، جانىمەن كەلگەن ۇلى جەڭىس كۇنىن بەيبىت ەلدە تويلاپ كەلەمىز. پوست كەڭەستىك مەملەكەتتەر سياقتى، ءبىزدىڭ ەلىمىزدە دە ءار 9 مامىر قۇرمەت-قوشەمەتپەن وتكىزىلەدى. ماڭگىلىك پولك مارشى ۇيىمداستىرىلىپ، الماتى كوشەلەرىنە ءوز باتىرلارىنىڭ سۋرەتىن، ماراپاتتارىن ۇستاعاندار شىعىپ، باتىرلار رۋحىنا تاعزىم ەتەدى. بيىلعى شاراعا ءداستۇر بويىنشا 100 مىڭنان اسا ادام قاتىسادى دەپ جوسپارلانىپ وتىر.

الماتىدا بۇل شەرۋ بەسىنشى جىل قاتارىنان وتكىزىلىپ جاتىر. بىلتىرعى شاراعا 10 مىڭنان اسا ادام قاتىسقان بولاتىن. ايتا كەتەلىك، «ماڭگىلىك پولك» ازاماتتىق اكسياسى 2012 جىلى رەسەيدىڭ تومسك قالاسىندا باستاۋ العان بولاتىن. كەيىن قوزعالىس قازاقستان، رەسەي، قىرعىزستان، ۋكراينا مەن يزرايلددە قولداۋ تاپتى. 2013 جىلى بۇل شارا 120 قالادا، ال 2014 جىلى جەتى ەلدىڭ 500-دەن استام قالاسىندا ۇيىمداستىرىلدى.

وكىنىشتىسى سول، جىل ساناپ ۇلى وتان سوعىسىنا قاتىسقان باتىر ارداگەرلەرىمىزدىڭ سانى ازايۋدا. ەڭبەك جانە حالىقتى الەۋمەتتى قورعاۋ مينيسترلىگىنىڭ اقپاراتىنا جۇگىنسەك، قازاقستاندا 2067 ۇلى وتان سوعىسىنىڭ ارداگەرى بار. ونىڭ كوبى، ياعني 369-ى الماتى قالاسىندا. بۇگىنگى استانا الاڭىنان باستالعان شەرۋ  تولە بي كوشەسى بويىمەن دوستىق داڭعىلىنا دەيىن، ارى قاراي ايتەكە بي كوشەسىمەن ءجۇرىپ، شەرۋ 28ء-شى پانفيلوۆشىلار ساياباعىندا اياقتالادى. شەرۋ 40 مينۋتقا سوزىلادى. باتىرلارىمىزدىڭ ەرلىگى ۇمىتىلمايدى.