وتكەندى ەسكە الماساڭ، بولاشاق بۇلىڭعىر. قان مايداندا كەۋدەسىن وققا توسىپ، ۇرپاقتىڭ بەيبىت كۇنىن قالىپتاستىرىپ كەتكەن ارداگەرلەردىڭ سانى جىل ساناپ ازايىپ بارادى. مايدان دالاسىندا ەرلىك كورسەتكەن باتىرلارمەن كەزدەسۋلەر مەكتەپتە، جوعارى وقۋ ورىندارىندا ءجيى ۇيىمداستىرىلىپ تۇرادى.

ادامزات بالاسى باسىنان وتكەرگەن سۇراپىل سوعىس تالاي جۇرەكتەرگە جازىلماس جارا سالدى. فاشيستەرمەن بەتپە-بەت كەلگەندە ميحايل ساۆەليەۆ 17 جاستا عانا بولعان. سۇم سوعىستىڭ قاسىرەتىن ارداگەر ءبىر ءسات ەستەن شىعارعان ەمەس. ول سۇراپىل سوعىستا ءان ايتىپ، جىگىتتەردى رۋحتاندىرعانىن ەسكە الادى.

«اسكەرگە دەيىن ءان ايتاتىنمىن. بالالايكادا ويناعاندى جاقسى كورەمىن. ۇلى وتان سوعىسىنىسڭ الدىندا مەن جاپونيامەن سوعىسقا اتتانعانمىن. سول ۋاقىتتا ول شايقاستان بۇرىن ەكىنشى دۇنيەجۇزىلىك سوعىسىنا جىبەردى. جەڭىسكە جەتكەن سوڭ، جاپون سوعىسىنا قاتىستىم»، - دەدى ۇلى وتان سوعىسىنىڭ ارداگەرى ميحايل ساۆەليەۆ.

انگە دەگەن قۇشتارلىعى كەيىن دە باسىلعان ەمەس. ول ءقازىر ارداگەرلەردەن قۇرالعان حوردا ءان سالادى. توقساندى القىمداعان ميحايل اتايدىڭ ايتۋىنشا، 9 مامىردى اسىعا كۇتەدى. سوعىستىڭ زۇلمات زامانىن باستان وتكەرگەن ول ءۇشىن جەڭىس مەرەكەسىنەن ارتىق مەيرام جوق. الماتىداعى №27 گيمنازيا وقۋشىلارى جاۋىنگەرلەرگە ارناپ شاعىن كونسەرت ۇيىمداستىردى. ءبىلىم وشاعىندا ارداگەر مايدان دالاسىندا باسىنان وتكەرگەن قيىنشىلىقتارى مەن جەڭىسكە قالاي جەتكەنىن جاستارعا بايانداپ بەردى.

ءبىلىم ورداسى جەڭىس مەرەكەسىنە وراي ارنايى كورمە اشقان. وقۋشىلار سوعىسقا قاتىسقان ءوز اتالارى مەن اپالارىنىڭ سۋرەتتەرىن ىلگەن. ودان بولەك، بالالاردىڭ قولىنان شىققان تۋىندىلارى دا قويىلعان.

«مەرەكەمىزدە ۇلى وتان سوعىسىنىڭ ارداگەرلەرى قاتىسۋدا. سول كىسىلەردىڭ دە سۋرەتتەرى بار. جىلدا وتكىزەتىن ءبىزدىڭ جۇمىسىمىز. سەبەبى ۇستازدىڭ ەڭ ءبىرىنشى ماقساتى - ول وتان سۇيەتىن جاقسى ازامات تاربيەلەۋ»، - دەدى الماتى قالاسى №27 گيمنازيانىڭ ديرەكتورى اينا ابدييەۆا.

بەيبىت ءومىر سىيلاعان ەكىنشى دۇنيەجۇزىلىك سوعىس ارداگەرلەرىمەن مۇنداي كەزدەسۋلەر مەكتەپتە ءجيى ۇيىمداستىرىلىپ تۇرادى، دەيدى مەكتەپ باسشىلىعى. الداعى ۋاقىتتا 53 سىنىپ وقۋشىسىمەن كەزدەسۋلەر وتپەك.