الماتىلىق دارىگەرلەر باس-مي تامىرلارىنىڭ پاتولوگياسىنا بىرەگەي وتا جاسادى. سونىڭ ارقاسىندا باسىنداعى ىسىكپەن 20 جىلداي ارپالىسقان ازامات قۇلان تازا ايىقتى. ميعا تىكەلەي بايلانىستى اۋرۋدى اۋىزدىقتاۋ ءۇشىن حيرۋرگتەر كۇردەلى وپەراسيانى ەكى كەزەڭگە ءبولىپ جاساعان.

ەربولات ەرەكەشوۆتىڭ شەكەسىنە وسىدان 20 جىل بۇرىن ىسىك شىعىپ، بەلگىسىز دەرت بويىن دەندەپتى. ۇنەمى باسى اۋىرىپ، قۇلاعىنان شۋ كەتپەگەن سوڭ ول تالاي دارىگەردىڭ الدىنا بارعان. ءتىپتى، وتا جاساتىپ، اۋرۋدى اۋىزدىقتاۋعا تىرىسىپتى. ءبىراق كەسەلى كۇن ساناپ اسقىنا تۇسكەن. ال باسىنداعى ىسىك سوڭعى جىلدارى مۇيىزدەي ۇلكەيىپ، ءتىپتى، ەلگە قاراۋعا دا قىمسىناتىن.

«اۋرۋ 95 جىلى پايدا بولدى باسىمدا. سەمەي قالاسىندا تۇرعانمىن ول كەزدە. سودان 4 جىلدىڭ ىشىندە ءوسىپ شىقتى كادىمگى ۇلكەن بولىپ. ەشكىم كومەكتەسە المادى. مەن قىتايعا باردىم 2012 جىلى. ول جاقتان كورىپ، اناليز، دياگنوز جاسادى. ولار گارانتيا بەرمەيمىز دەدى. باس اينالۋ بولعان، كوزىم قاراۋىتىپ كەتۋ دەگەن سياقتى نارسەلەر بولعان»،- دەدى ەربولات ەرەكەشوۆ.

دارىگەرلەردەن كۇدەر ۇزگەن ازامات سوڭعى ءۇمىتىن ۇكىلەپ، بىلتىر الماتىداعى ورتالىق كلينيكالىق اۋرۋحاناعا باس سۇعىپتى. مۇنداعىلار ەربولاتقا ارتەريوۆەنوزدىق فيستۋلا، ياعني باس-مي تامىرىنىڭ پاتولوگياسى دياگنوزىن قويعان. حيرۋرگتەر وتە سيرەك كەزدەسەتىن اۋرۋدى جويۋ ءۇشىن كۇردەلى وتا جاساۋعا بەل بۋادى. باستاعى ىسىك مي تامىرلارىمەن استاسقان ەكەن. سوندىقتان دارىگەرلەر وپەراسيانى ەكى كەزەڭگە ءبولىپ جاساعان.

«وپەراسيانىڭ ۇلكەن اسقىنۋلارى بولۋى مۇمكىن ەدى، ءبىر رەت ىستەيتىن بولساق. ولقان كەتۋ، جوعارى قان جوعالتۋ، اسقىنۋلارى. سول سەبەپتەن ءبىز بۇل وپەراسيانى بىرنەشە ەتاپقا ءبولىپ ىستەدىك. ءبىرىنشى ەتاپپەن ىسىككە باراتىن تامىرلاردى جاۋىپ، ودان كەيىن كەلەسى كەلگەن كەزدە ەكىنشى ەتاپپەن سول ىسىكتى تۇگەلدەي الىپ تاستادىق»،-دەدى  ورتالىق كلينيكالىق اۋرۋحانانىڭ نەيروحيرۋرگ دارىگەرى مارات سارشيەۆا. 

ءساتتى جاسالعان وتادان امان شىعىپ، باسىنداعى مۇيىزدەي ىسىكتەن قۇتىلعان ەربولاتتىڭ ءقازىر قۋانىشى قوينىنا سىيماي ءجۇر. ال اق حالاتتىلار ناۋقاستىڭ جاعدايىن ارمەن قاراي ۇنەمى باقىلاۋدا ۇستايتىنىن جەتكىزدى.