الماتىدا بيىل تەگىن ساناتورلى-شيپاجايلىق ەمدەۋمەن 4000 زەينەتكەر قامتىلماق. وسى جىلدان باستاپ جولداما بەرۋ ەرەجەسىنە وزگەرىستەر ەنگىزىلدى. بۇگىنگى كۇنى قالاداعى زەينەتكەرلەردىڭ سانى 222 مىڭنان اسىپ جىعىلادى.

36 جىل مەملەكەتتىك قىزمەتتە جۇمىس ىستەگەن بولات دوسكەيەۆ زەينەتكە شىققانىنا بىرنەشە جىل بولدى. جۇبايى ەكەۋىنىڭ زەينەتاقىسىن قوسا ەسەپتەگەندە، ولار قولىنا 100 مىڭ تەڭگەدەن اسا قارجى الادى. ودان بولەك، سەكسەننىڭ سەڭگىرىنەن اسقان قاريا ءتۇرلى الەۋمەتتىك كومەكتى الىپ وتىرادى.

«جولاقىلارىن تولەيدى. كوممۋنالدىق ۇيدەگى جاساپ جاتقان ەسەپتەۋىش قۇرالدار كورسەتەتىن بارلىعىنىڭ وعان شىققان شىعىندى تولەيدى. ەلەكتروەنەرگيا كوبەيىپ كەتسە، ونى تولەپ وتىر. سوندىقتان مەن ويلايمىن زەينەتكەر ادامداردى مەملەكەت شەت جاقتا قالدىرىپ وتىرعان جوق»، - دەدى بولات دوسكەيەۆ.

بۇل الەۋمەتتىك كومەكتەردەن بولەك، قاريا ساناتورلى-شيپاجايعا ەمدەۋمەن قامتىلماق. ءقازىر ول قۇجاتتارىن دايىنداپ ءجۇر. اتاپ وتەرلىگى، مۇنداي جولداما بەرۋ ەرەجەسىنە وزگەرىستەر ەندى. بۇعان دەيىن تەگىن دەمالىسپەن قامتىلۋشى قارتتار تەك قالا اۋماعىنداعى ساناتوريادا ەمدەلە السا، وسى جىلدان باستاپ، ەلىمىزدىڭ كەز كەلگەن اۋماعىنداعى شيپاجايدى تاڭداۋ مۇمكىندىگىن يەلەندى.

«2017 جىلى زەينەتكەرلەرگە 4071 جولداما بەرىلسە، وسى اعىمداعى جىلى 4000 جولداما قاراستىرىلعان زەينەتكەرلەرگە. ال جاڭا زاڭ بويىنشا زەينەتكەرلەر ءوز قالاۋىمەن ق ر كەز كەلگەن ساناتورلىق-كۋروروتتىق ەمدەۋ الۋ مۇمكىندىگى بار. سول قاراجات مەملەكەت تاراپىنان 109910 تەڭگە كولەمىندە قايتارىلادى»، - دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باس مامانى جازيرا كايروۆا.

وسى جىلدان باستاپ قاريالارعا كورسەتىلەتىن الەۋمەتتىك كومەك كولەمى دە ۇلعايدى. ونىڭ ىشىندە ءبىر جولعى كورسەتىلەتىن جانە جارتى جىلدىق كومەك بار.

«مامىر ايىنان باستاپ ءبىر جولعى الەۋمەتتىك كومەك 10 ايلىق ەسەپتىك كورسەتكىشكە ۇلعايدى. ونىڭ كولەمى بۇعان دەيىن 7،5 ايلىق ەسەپتىك كورسەتكىش كولەمىندە ەدى. ول جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن ەكى ايلىق ەسەپتىك كورسەتكىشتەن اسپايتىن زەينەتكەرلەر جانە الەۋمەتتىك از قامتىلعان ازاماتتارعا بەرىلەدى. سونداي-اق زەينەتكەرلەر سۋىق جانە ىستىق سۋدى ەسەپتەيتىن، گازبەن جابدىقتاۋ جەكە ەسەپتەۋىش قۇرىلعىلارىن ورناتۋ شىعىنىنا الەۋمەتتىك كومەك كورسەتىلەدى»، - دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى الەۋمەتتىك تولەمدەر ءبولىمىنىڭ باسشىسى گۇلنار مۇحامەتوۆا.

ءقازىر قالادا 222 مىڭنان استام زەينەركەر تۇرادى. ونىڭ ىشىندەگى تۇرمىسى تومەن 10 مىڭنان استامىنا الەۋمەتتىك كومەك كورسەتىلەدى.