الماتىدا ەۋروپا كينوسىنىڭ اپتالىعى باستالدى.

ءداستۇرلى شارادا ۇلىبريتانيا، ماجارستان، گەرمانيا جانە فرانسيانىڭ كينوكارتينالارى كورسەتىلەدى. اپتالىق «ارمان» كينوورتالىعىندا وتەدى. فيلمدەر ءتۇپنۇسقا تىلدە ورىسشا سۋبتيترمەن كورسەتىلەدى.

ءداستۇرلى شارا شىمىلدىعىن ۇلىبريتانيالىق رەجيسسەر ستيۆەن ءلاۆريدجدىڭ «ماتانگي/ماييا» اتتى دەرەكتى ءفيلمى اشتى. كينوكارتينادا شري-لانكانىڭ تۋماسى ماتانگي ارۋلپراگاسامنىڭ ءومىرى تۋرالى باياندالادى. تانىمال ءانشى تۋرالى تۋىندى تمد اۋماعىندا تۇڭعىش رەت كورسەتىلىپ وتىر.

«كەزەكتى ەۋروپا كينوسىنىڭ اپتالىعىندا بۇرىنعىدان قىسقا فورماتتى تاڭدادىق. اپتالىقتا ەڭبەك جولىن ەندى باستاپ جاتقان جاس رەجيسسەرلاردىڭ تۋىندىلارى كورسەتىلەدى. ولاردىڭ فيلمدەرى وسى ۋاقىتقا دەيىن كينوسىنشىلاردىڭ جوعارى باعاسىن العان. سونداي-اق تالاي حالىقارالىق كينوفەستيۆالدە جۇلدەلەردى يەلەنگەن»،-دەدى بريتان كەڭەسى ماركەتينگ جانە قوعاممەن بايلانىس جونىندەگى مەنەدجەرى ەلەنا سيم.

ۇيىمداستىرۋشىلار ءار كورەرمەننىڭ قالاۋىنا ساي كەلەتىندەي ءتۇرلى جانرلاردى قامتيتىن باعدارلاما قۇردىق - دەيدى. اپتالىق اياسىندا نەمىس رەجيسسەرىنىڭ «قاتارلار اراسىندا»، «كۇن ساۋلەسىن كىرگىز» مەلودراماسى جانە «يۋپيتەردىڭ جەرسەرىگى» اتتى فيلمدەر كورسەتىلەدى.

جالپى، شارا اياسىندا كارى قۇرلىق مەملەكەتتەرىنىڭ اسا تانىمال 4 كينوتۋىندىسى كورسەتىلەدى. ارنايى ىرىكتەلگەن كارتينالاردىڭ بارلىعى ەۋروپالىق بولمىستان سىر شەرتىپ، ونداعى حالىقتىڭ تىنىس-تىرشىلىگىن باياندايدى. سونداي-اق قۇرلىقتىڭ توعىسقان ءتۇرلى مادەنيەتىن جاڭا قىرىنان تانىتاتىن اپتالىق تۇرعىنداردىڭ كوپتەن كۇتەتىن شاراسىنا اينالىپ ۇلگەرگەن.

ەۋروپا كينوسىنىڭ اپتالىعى 27 مامىرعا دەيىن وتەدى.  ەۋروپانىڭ شىنايى بەينەسىن جاڭا قىرىنان تانىتاتىن تىڭ كارتينالار «ارمان» كينوورتالىعىندا كورسەتىلەدى. جۇرتشىلىق نازارىنا ۇسىنىلاتىن بارلىق تۋىندىلار ورىس تىلىندەگى سۋبتيترلارمەن ءتۇپنۇسقادا بەرىلەتىن بولادى.